დროას ლიდერის, ელენე ხოშტარიას განცხადებით, მთავარი გარანტია არჩევნების არგაყალბებისა და მშვიდობიანი ცვლილების, არის ბევრი ხალხი უბნებზე. ამის შესახებ მან ტელევიზიებთან გამართულ პრესკონფერენციაზე ისაუბრა.

"არ აქვს მნიშვნელობა, ვის აძლევთ ხმას. ბევრი ხალხი ნიშნავს, ვერ აყალბებენ, არ ჰყოფნით უბრალოდ და მშვიდობიანად ხდება ცვლილება. 3 ოქტომბერს, 2 ოქტომბერს ღამე შეიკვრება კოალიციური უმრავლესობები ძალიან ბევრ ადგილას, თბილისის ჩათვლით. პირდაპირ გეუბნებით, გამარჯვება ნიშნავს ამას, შეიქმნება კოალიციური უმრავლესობები და დაიწყება, მათ შორის, ჩვენს პარტნიორებთან ერთად მოლაპარაკებები რიგგარეშე არჩევნების დანიშვნაზე. თუ ყველა მივალთ არჩევნებზე, ჩვენ ვართ მობილიზებულები, უმრავლესობა იქნება ოპოზიციის, დავსხდებით, შევკრავთ უმრავლესობას, გარდაუვალია რიგგარეშე არჩევნები", — განაცხადა მან.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.