სოზარ სუბარმა მთავრობის სხდომის დასრულების შემდგომ პრეზიდენტის არჩევის წესზე ისაუბრა. მისი თქმით, პრეზიდენტს არც ერთი უფლება არ ეზღუდება და პრეზიდენტის უფლებამოსილებების შეკვეცა არ ხდება.

დევნილთა და განსახლების მინისტრის თქმით, ქართული ოცნების უმრავლესობამ დიდი ხნის წინ განაცხადა, რომ მხარს უჭერს საპარლამენტო მოდელს. მისივე თქმით, პრეზიდენტის არჩევის წესი უნდა იყოს ისეთი, როგორც საპარლამენტო რესპუბლიკას შეესაბამება.

სუბარის განცხადებით, თუ პრეზიდენტის არჩევის წესი შეიცვლება ის ძალაში მხოლოდ 2023 წელს შევა. ხოლო 2018 წლის საპრეზიდენტო არჩევნები დღეს არსებული წესით ჩატარდება:

„რამდენიმე დღის წინ პრეზიდენტის მრჩეველმა [ფიქრია ჩიხრაძემ] გააკეთა განცხადება, სადაც მკაფიოდ გამოჩნდა, რომ ისინი მხარს უჭერენ საპრეზიდენტო მოდელს, რაც განხილვის საგანი ბუნებრივი შესაძლებელია იყოს და შეუძლიათ რეფერენდუმიც ჩაატარონ ამ თემაზე.
პარტიის უმრავლესობამ მკაფიოდ გააკეთა დიდი ხნის წინ განცხადება, რომ ჩვენ გადავდივართ საპარლამენტო მოდელზე. საპარლამენტო მოდელს აქვს თავისი ლოგიკა და ასე უნდა იყოს აწყობილი კონსტიტუცია და ძალების ბალანსიც. პრეზიდენტის არჩევის წესი უნდა იყოს ისეთი, როგორიც შეესაბამება საპარლამენტო რესპუბლიკას კლასიკურ ფორმებში. მიღებულ იქნა გადაწყვეტილება, რომ არჩევის წესის ცვლილება ძალაში არ შევა 2018 წლამდე. 2018 წლის არჩევნები ჩატარდება იმ წესით, რომლითაც აქამდე ტარდებოდა და მხოლოდ შემდგომი არჩევნები 2023 წელს პარლამენტი აირჩევს პრეზიდენტს, თუ, რა თქმა უნდა, ეს ცვლილება შევა კონსტიტუციაში.“