მოძრაობა თავისუფლებისთვის-ევროპული საქართველოს ერთ-ერთი ლიდერი გიგა ბოკერია აცხადებს, რომ პარტია ცალსახად გმობს ძალადობას და მისთვის არ აქვს მნიშვნელობა, რა მიზეზით, რა ლეგიტიმური საფუძვლებით იყო ეს გამოწვეული.

გიგა ბოკერიას განცხადებით, ასეთი ძალადობა და ვანდალიზმი აზიანებს და საფრთხეს უქმნის საქართველოს თითოეულ მოქალაქეს:

"ეს ხელს აძლევს ისეთ უპასუხისმგებლო ხელისუფლებას, როგორიც დღეს გვყავს სამწუხაროდ. პასუხისმგებლობის გრძნობის მქონე ოპოზიცია არ შეიძლება ნებისმიერ პროტესტში ან მითუმეტეს არეულობაში ხედავდეს საკუთარ პოლიტიკურ შანსს ან არ ყოფნიდეს მოთმინება, რომ გაერკვეს ვითარებაში, სანამ პოზიციას დააფიქსირებს. სწორედ ამიტომ მოძრაობა თავისუფლებისთვის-ევროპული საქართველოს არც ერთ ეტაპზე არანაირი სოლიდარობა არ გამოუხატავს ამ პროცესის მიმართ, მაგრამ პოლიტიკური პასუხისმგებლობა ცალსახად არის ივანიშვილის მთავრობის. ხუთი წელია ეს ხალხი ანგრევს სახელმწიფო ინსტიტუტებს, ახალისებს ძალადობრივ ჯგუფებს, პოლიტიკურ ძალადობას, ნერგავს ნიჰილიზმს სამართალდამცავი ორგანოების მიერ.

საათების განმავლობაში, საქართველოს ერთ-ერთ ქალაქში ქაოსი და ძალადობა მძვინვარებდა ისე, რომ ხელისუფლება არაფერს აკეთებდა და თავად შეუწყო ხელი ამ ყველაფერს. ამ ვითარებიდან გამოსავალი არის ერთადერთი, ბევრი მოქალაქის სამოქალაქო აქტიურობა და ხელისუფლების შეცვლა დემოკრატიული არჩევნების გზით".

ბათუმში მომხდარ არეულობაზე გამოძიება ორი მუხლით მიმდინარეობს.