ჯანდაცვის მინისტრის მოადგილე, თამარ გაბუნია აცხადებს, რომ კორონავირუსის ინფექციის გავრცელება ნებისმიერმა სოციალურმა აქტივობამ შეიძლება დააჩქაროს. ის განსაკუთრებულ ყურადღებას ამახვილებს ბათუმში, საკურორტო სეზონზე გამართულ გასართობ ღონისძიებებზე.

"ნებისმიერი სოციალური აქტივობა დღეს შეიძლება გახდეს ბუსტერი ინფექციის გავრცელებისთვის [...] რა თქმა უნდა, ბათუმში რომ აქტივობა ძალიან მაღალია, ამას ყველა ვხედავთ. ნამდვილად საგანგაშოა ის ვიდეოები და ფოტოები, რაც ვრცელდება სოციალურ ქსელში ბათუმის გასართობი ღონისძიებებიდან და თუნდაც, სოციალური თავყრილობებიდან", — განაცხადა თამარ გაბუნიამ.

დღეს სოციალურ ქსელში გავრცელდა ვიდეო, სადაც ჩანს როგორ ქეიფობს პრემიერმინისტრი, ირაკლი ღარიბაშვილი ხალხმრავალ სუფრაზე. ვიდეოში ჩანს, რომ სივრცეში არ არის დაცული სოციალური დისტანცია, შეკრებილები არიან პირბადის გარეშე და ირღვევა სხვა რეკომენდაციებიც. ვიდეო სავარაუდოდ კახეთში, სოფელ არხილოსკალოშია გადაღებული, სადაც ღარიბაშვილი ოლიმპიური ჩემპიონის, ლაშა ბექაურის დახვედრის ცერემონიას დაესწრო.

აღსანიშნავია, რომ გუშინ, 6 აგვიტოს, ბათუმის ბულვარის ადმინისტრაციამ დამსვენებლებს აცრისა და ვირუსის საპრევენციო ღონისძიებების შესრულებისკენ მოუწოდა.

გაიგე მეტი: