ადამიანის უფლებებზე მომუშავე არასამთავრობო ორგანიზაციები და ქალი დეპუტატები პარლამენტის თავმჯდომარისგან მოითხოვენ ადეკვატურ რეაგირებას იმ კაცი დეპუტატებს ქმედებებზე, რომლებმაც ქალი დეპუტატების პროტესტს ფიზიკური ძალის გამოყენებით შეეწინააღმდეგნენ.

აღსანიშნავია, რომ უფლებადამცველი ქალები ბრიფინგის ჩატარებას პარლამენტში აპირებდნენ, თუმცა, ისინი საკანონმდებლო ორგანოში არ შეუშვეს. ამიტომ, მათ განცხადების გაკეთება პარლამენტის უკანა შესასვლელთან მოუწიათ.

"მივმართავთ კახა კუჭავას, რომ მიიღოს სათანადო ზომები იმ პარლამენტის წევრების დასასჯელად, ვინც ფიზიკურად გამოიყენა ძალა ქალი პარლამენტის წევრების მიმართ, რადგან მსგავსი ქმედება ფეხქვეშ თელავს ყველა იმ რეფორმას ქალთა უფლებების დაცვის თვალსაზრისით, რომელიც პარლამენტს მიუღია.

18 ივლისს კაცებმა პარლამენტში გვითხრეს, რომ თუ ქალის საუბარი, მისი გამოხატვის მანერა არ მოსწონთ, შეუძლიათ ხელით, ფიზიკურად გააჩერონ ის. ამიტომ, ბატონო კახა, გთხოვთ გამოხატოთ თქვენი პოზიცია და იმოქმედოთ თქვენი უფლებამოსილების ფარგლებში იმისათვის, რათა პასუხი გავცეთ მოძალადე პარლამენტის წევრ მამაკაცებს", — განაცხადა თამარ კორძაიამ.

განცხადებაში ვკითხულობთ, რომ პარლამენტში ქალების მიმართ სექსისტურ და დისკრიმინაციულ გამონათქვამებს სისტემური სახე აქვს, თუმცა არც ერთი სხვა მოწვევის პარლამენტში ქალი დეპუტატების მიმართ ფიზიკური ძალადობის ფაქტი არ დაფიქსირებულა.

"ეს ძალადობრივი ქმედებები ჩრდილს აყენებს ნებისმიერ კანონს, რომელიც პარლამენტს მიუღია ქალთა უფლებების გასაძლიერებლად, რადგან საკანონმდებლო ორგანოშივე საჯაროდ ხდება მათი გათელვა გამოვლენილი ფიზიკური ძალადობით, ძალადობის ფაქტის არაღიარებით, დუმილით ან გამართლებით", — ვკითხულობთ განცხადებაში, რომელსაც ცალკეული უფლებადამცველი ქალების გარდა ხელს აწერენ შემდეგი ორგანიზაციები, სამოქალაქო მოძრაობები თუ პარტიები:

  • ქალთა მოძრაობა;
  • ქალები საერთო მომავლისთვის (WECF) საქართველო;
  • ქალები საქართველოდან;
  • კავშირი საფარი;
  • ქალთა ფონდი საქართველოში;
  • ფონდი ტასო;
  • პარტნიორობა ადამიანის უფლებებისთვის (PHR);
  • სამართლიანი არჩევნები (ISFED);
  • ახალგაზრდა იურისტთა ასოციაცია (საია);
  • საერთაშორისო გამჭირვალობა - საქართველო (TI);
  • მედიის განვითარების ფონდი (MDF);
  • თბილისი პრაიდი;
  • თანასწორობის ცენტრი;
  • სამართლებრივი კვლევის, სწავლებისა და დახმარების ცენტრი;
  • კავშირი ფრეია;
  • ახალგაზრდა ფემინისტები;
  • We 4 education;
  • ფემინა;
  • პროგრესის ცენტრის;
  • წითელი ხაზები;
  • ერთიანი ნაციონალური მოძრაობა;
  • პოლიტიკური მოძრაობა დროა;
  • რესპუბლიკური პარტია;
  • პოლიტიკური გაერთიანება ლელო საქართველოსთვის;
  • პარტია ანა დოლიძე — ხალხისთვის ვაწერთ ხელს;
  • ერთიანი საქართველო — დემოკრატიული მოძრაობა;
  • ევროპული საქართველო — მოძრაობა თავისუფლებისთვის;
  • სტრატეგია აღმაშენებელი;
  • პარტია სამართლიანობისთვის;
  • პარტია საქართველოსთვის.

18 ივლისს, პარლამენტში შინაგან საქმეთა მინისტრის, ვახტანგ გომელაურის გამოსვლისას ჟურნალისტებმა პლენარული სხდომის დარბაზში საპროტესტო ბანერი გადმოფინეს, წარწერით — "დასაჯეთ მოძალადეები". პარალელურად, ოპოზიციონერმა დეპუტატებმა გომელაურს სიტყვა შეაწყვეტინეს და ტრიბუნასთან გარდაცვლილი ოპერატორის, ლექსო ლაშქარავას ფოტოები გაშალეს. ამას დარბაზში სიტყვიერი და ფიზიკური დაპირისპირება მოჰყვა.

შალვა პაპუაშვილმა პარლამენტის თავმჯდომარის ტრიბუნისკენ მიმავალი კოლეგა, თინა ბოკუჩავა ფიზიკური ძალის გამოყენებით გამოიყვანა ადგილიდან. ბოკუჩავა ამბობს, რომ თავდაპირველად ამის მცდელობა ლევან მგალობლიშვილს ჰქონდა, რომელსაც შემდეგ პაპუაშვილი შეუერთდა. ნონა მამულაშვილი დაპირისპირების დროს საპროტესტო პლაკატით ხელში მაგიდაზე ავიდა, რა დროსაც ირაკლი ზარქუამ ის ძალით ჩამოიყვანა.

გუშინ, 21 ივლისს, მამულაშვილმაც და ბოკუჩავამაც ზარქუას, პაპუაშვილის და მგალობლიშვილის წინააღმდეგ პარლამენტის ეთიკის საბჭოში საჩივარი შეიტანეს.

გაიგე მეტი: