კულტურის, სპორტისა და ახალგაზრდობის მინისტრის, თეა წულუკიანის განცხადებით, ჟურნალისტებს პრემიერმინისტრ ღარიბაშვილის 5 ივლისის განცხადება "ამოჩემებული" აქვთ და ასაღებენ ისე, თითქოს მან ძალადობა წაახალისა. წულუკიანის მტკიცებით, სინამდვილეში, პირიქით იყო.

"თქვენ 5 ივლისის პრემიერის განცხადება გაქვთ, ბოდიში ამ სიტყვისთვის, ამოჩემებული და ამას ასაღებთ ისე, თითქოს პრემიერმა როდისმე ძალადობა მოიწონა, ან ეს ძალადობა წაახალისა. პირიქით, სწორედ მთავრობის იმ სხდომაზე, პრემიერმინისტრმა თქვა ის, რაც უნდა ეთქვა ყველა ლიდერს, რომ თავი შევიკავოთ ამა და ამ კონკრეტულ ადგილას, საუბარი იყო რუსთაველის გამზირზე შეკრებისაგან და ამით მან მიმართა, თავის დროზე, 5 ივლისს, ლგბტ თემს.

ძალიან სამწუხაროა, რომ ლგბტ თემმა არ გაითვალისწინა ქვეყნის ლიდერის ეს მოწოდება, რომელიც მხოლოდ და მხოლოდ მათი ინტერესებიდან იყო გამომდინარე. უფრო მეტიც, მთავრობამ და მისმა მეთაურმა მაშინ შესთავაზა ლგბტ თემს, რომ თავიანთი გამოხატვის თავისუფლება კი არ გადაედოთ გვერდზე, არამედ ეს შეკრება ჩაეტარებინათ სხვაგან", — თქვა წულუკიანმა.

მისივე თქმით, ესმის, რომ ზოგიერთი მედიის და ოპოზიციის მიზანი "პროვოკაციების კასკადია", მაგრამ "ფაქტი ფაქტად რჩება", რომ ლგბტ თემმა პრემიერის მაშინდელი განცხადება "არ გაიზიარა".

გარდა ამისა, წულუკიანმა აღნიშნა, რომ პოლიციის შესაძლებლობები ამოუწურავი არ არის და ამიტომ "პოლიცია და შინაგან საქმეთა მინისტრი როდესაც გვაძლევს რჩევას, რომ გამოხატვის თავისუფლება განვახორციელოთ, მაგრამ გვთავაზობს სხვადასხვა მისაღებ გზას, ამას ჰქვია სახელმწიფოსთან თანამშრომლობა და ეს უნდა გავიგონოთ ხოლმე".

ჟურნალისტების კითხვას, რომ როდესაც მარშს პროვოკაციას უწოდებენ, ნიშნავს თუ არა ეს იმას, რომ ელჩებსაც პროვოკაციაში ადანაშაულებენ, წულუკიანი ასე პასუხობს:

შეწყვიტეთ ჩემი და საქართველოს სხვა ჩემნაირი სხვა მოქალაქეების ძალიან დიდი უმრავლესობის დაშინება და შეშინება ევროკავშირითა და ამერიკით. ჩვენ ამ დაშინებით არ შევიცვლით ორიენტაციას — ეს არის ევროატლანტიკური ორიენტაცია".