TV პირველის მიერ ფარული ჩანაწერების გავრცელებიდან 3 თვეში პროკურატურამ ბრიფინგი გამართა, სადაც განაცხადა რომ ჩანაწერში ვერ დაინახა დანაშაულის ნიშნები ბერა ივანიშვილის, ირაკლი ღარიბაშვილისა და ანზორ ჩუბინიძის მხრიდან. ამავდროულად, პროკურატურა ამტკიცებს, რომ ჩანაწერები მოდელირებული და გაყალბებულია და არანაირი მტკიცებულებითი ძალა არ გააჩნია. უწყებამ ყურადღება გაამახვილა იმაზეც, რომ წინა ხელისუფლების დროს აღნიშნულ პირებს უკანონოდ უსმენდნენ.

პროკურატურის მტკიცებით, ჩანაწერების შესწავლამ გამოავლინა, რომ იყო მცდელობა არამხოლოდ ფრაზების, არამედ სიტყვებისა და ბგერების ამოჭრით შექმნილიყო დიალოგი. მაგალითად, უწყება ამტკიცებს, რომ ბერა ივანიშვილი არ ამბობს, რომ ირაკლი ღარიბაშვილს "დაურეკავენ მინისტრები", არამედ ორი სიტყვის შეერთებით მიღებულია სიტყვა "მილი სტები".

ვნახოთ დეტალურად, რა გავიგეთ პროკურატურიდან გამოძიების შუალედური შედეგებით.

როდინდელია ჩანაწერი

უწყების მტკიცებით, საგამოძიებო მოქმედებებით დადგინდა, რომ წინა ხელისუფლება ბიძინა ივანიშვილსა და მის გარემოცვას უკანონოდ უსმენდა 13 სისხლის სამართლის საქმის ფარგლებში. კერძოდ: ნარკოტიკული საშუალების რეალიზაციის, ქურდული სამყაროს წევრობის, განზრახ მკვლელობის, ტერორიზმის, უკანონო შემოსავლის ლეგალიზაციის, თაღლითობის და ამომრჩეველთა მოსყიდვის, ასევე მსჯავრდებულ პირთა ძებნის ფაქტებზე. პროკურატურის განცხადებით, საწმის მასალების შესწავლით დგინდება, რომ ამ პირებს არანაირი კავშირი და შემხებლობა საქმეებში მითითებულ ფაქტებთან არ ჰქონიათ მიყურადებისთვის საფუძვლები იქმნებოდა უკანონოდ, საპროცესო კანონმდებლობის უხეში დარღვევით.

"გამოძიების მსვლელობისას ჩატარებული საგამოძიებო-საპროცესო მოქმედებების შედეგად დადგინდა, რომ ირაკლი ღარიბაშვილის, ბერა ივანიშვილის და ანზორ ჩუბინიძის კუთვნილ მობილური ტელეფონის ნომრებზე ფარული მიყურადება მიმდინარეობდა 2011 წლის ოქტომბრიდან 2012 წლის ოქტომბრამდე პერიოდში. კერძოდ, მათ მიმართ ფარული სატელეფონო მოსმენა რამდენიმე სისხლის სამართლის საქმეში, კონსტიტუციური უსაფრთხოების დეპარტამენტის ხელმძღვანელი თანამდებობის პირების დავალებითა და ორგანიზებით 2011 წლის 4 ოქტომბერს დაიწყო, ანუ ბიძინა ივანიშვილის მიერ ოპოზიციური პოლიტიკური პარტიის შექმნისა და 2012 წლის საპარლამენტო არჩევნებში მონაწილეობის თაობაზე საჯარო განცხადების გაკეთებამდე ერთი დღით ადრე", — აცხადებენ უწყებაში.

პროკურატურის თქმით, გამოკითხეს ამ დეპარტამენტის ის ყოფილი თანამშრომლები, რომლებიც უშუალოდ ახორციელებდნენ ან/და სხვაგვარად იყვნენ დაკავშირებული ბერა ივანიშვილის, ირაკლი ღარიბაშვილის და ანზორ ჩუბინიძის სატელეფონო მოსმენებთან. მათივე თქმით, მოწმეებმა დაადასტურეს 2011-2012 წლებში მოსმენის ფაქტი და ფრაგმენტულად გაიხსენეს გავრცელებულ ჩანაწერებში წარმოებული დიალოგები.

ამ მოსაზრებას პროკურატურა ამტკიცებს ექსპერტიზის დასკვნითაც. კერძოდ, უწყებაში ამბობენ, რომ ჩატარდა ფოტოსკოპიური ექსპერტიზა, რომლითაც დადგინდა შემდეგი:

"მოსაუბრე, რომლის ხმაც მსგავსია ბერა ივანიშვილის ხმისა, ჩანაწერების გაკეთების მომენტში არის მოზარდი 13-18 წლამდე დიაპაზონში. მოსაუბრე, რომლის ხმაც მსგავსია ირაკლი ღარიბაშვილის ხმისა, ჩანაწერების გაკეთების მომენტში არის 25-30 წლამდე დიაპაზონში, ხოლო მოსაუბრე, რომლის ხმაც მსგავსია ანზორ ჩუბინიძის ხმისა, ჩანაწერების გაკეთების მომენტში არის 35-40 წლამდე დიაპაზონში.

ფონოსკოპიური ექსპერტიზით ასევე დადგენილია, რომ აუდიო ჩანაწერებში მონაწილე პირთა კომუნიკაციის ფორმა არის სატელეფონო. კომუნიკაციის ფორმის, მოსაუბრეთა საორიენტაციო ასაკისა და მათი დაბადების თარიღების მხედველობაში მიღებით, კიდევ ერთხელ დასტურდება აუდიო ჩანაწერების მონტაჟისთვის სწორედ 2011-2012 წლებში განხორციელებული ფარული მიყუდარებების შედეგად მოპოვებული საუბრების გამოყენების ფაქტი".

რეაგირება "შავ პიარზე"

ჩანაწერების გავრცელების შემდეგ სამოქალაქო საზოგადოება და ოპოზიცია მისი შინაარსის შესწავლას და სავარაუდო დანაშაულზე რეაგირებას ითხოვდა. პროკურატურის განცხადების მიხედვით, ასეთი დანაშაული მათ ვერ აღმოაჩინეს და მხოლოდ ის დაადგინეს, რომ ივანიშვილის დაცვის სამსახური მუქარის შემცველ განცხადებებზე გადამოწმების მიზნით რეაგირებდა.

"ჩატარებული გამოძიებით ასევე დადგინდა, რომ 2011 წლის ოქტომბერში, ოპოზიციური პოლიტიკური პარტიის შექმნისა და 2012 წელს დაგეგმილ საპარლამენტო არჩევნებში მონაწილეობის მიღების თაობაზე საჯარო განცხადების გაკეთების შემდგომ, ბიძინა ივანიშვილის ოჯახის, მათ შორის არასრულწლოვან ბერა ივანიშვილის მიმართ დაიწყო შავი პიარის მასიური კამპანია, რასაც თან ახლდა საჯარო სივრცეში, მათ შორის სოციალურ ქსელებში მუქარის შემცველი განცხადებების თუ შეტყობინებების გავრცელება.

უსაფრთხოების მიზნით, მუქარის შემცველი შეტყობინებები დაცვის სამსახურს გადაეცემოდა, რომელსაც ანზორ ჩუბინიძე ხელმძღვანელობდა. დაცვის სამსახური ამოწმებდა კონკრეტული ინფორმაცია იყო თუ არა რეალური საფრთხის შემცველი.
გამოძიების მსვლელობისას გამოიკითხა ყველა ის პირი, რომელთა იდენტიფიცირებაც გამოძიებამ შეძლო ტელეკომპანია პირველის ეთერში გასული ჩანაწერების გამოყენებით.
დადგინდა, რომ 2011 წელს მუქარის შემცველი შეტყობინებების გადამოწმების მიზნით, ბერა ივანიშვილის დაცვის სამსახურის წარმომადგენლები, შეტყობინების ავტორებს ორ შემთხვევაში შეხვდნენ და გაესაუბრნენ. შეხვედრა შედგა მუქარის შემცველი შეტყობინებების ავტორების საცხოვრებელ მისამართზე, მათივე მშობლების და მეზობლების თანდასწრებით. შეხვედრისას არანაირ ძალადობას, მუქარას, იძულებას ან სხვა დანაშაულის ნიშნებს ადგილი არ ჰქონია", — აცხადებენ უწყებაში.

თუმცა ჩანაწერებში საუბარია პირებზე, რომელთა დასჯასაც, სავარაუდოდ, ბერა ითხოვს მისთვის სიტყვიერი შეურაცხყოფის მიყენების გამო. ჩანაწერის მიხედვით, ბერა ავალებს ანზორ ჩუბინიძეს, რომ იმ ადამიანებს ბოდიში მოახდევინოს. საუბარია ბიზიკურ ანგარიშსწორებაზეც. გარდა ამისა, ჩანაწერის მიხედვით, ბერა ივანიშვილი და ღარიბაშვილი განიხილავენ, როგორ განვითარდა მოვლენები და იცინიან იმაზე, რომ "გათეთრებული" და "აკანკალებული" ბავშვი ბერას ბოდიშებს უხდიდა.

"მოდელირებული და გაყალბებული"

პროკურატურის თქმით, საქალაქო სასამართლოს განჩინების შემდეგ, შესთავაზეს ტელევიზიას, რომ მათთვის მისაღებ დროსა და ვითარებაში, მისაღები ფორმით, გამოძიებისთვის გადაეცათ ფარული აუდიო ჩანაწერების პირველადი, დაუმუშავებელი ვერსია, რაზეც უარი მიიღეს და მათთვის ამ დრომდე არ გადაუციათ. არსებული ჩანაწერების შესწავლის შემდეგ კი, უწყება ამტკიცებს რომ ისინი დამონტაჟებულია და შერჩევითი ფიქსაციის გზით, მიღებულია შეცვლილი შინაარსის მქონე სიტყვები და წინადადებები. მათივე მტკიცებით, მონტაჟის კვალი აღინიშნება 170 ადგილას.

"მონტაჟის მიზნით, სპეციალური პროგრამების გამოყენებით, მათზე დადებულია სხვადასხვა აუდიო ჩანაწერიდან აღებული ფონი და რედაქტირების შემდეგ საბოლოოდ მიღებულია შეცვლილი შინაარსის მქონე აუდიო ჩანაწერები.

ბუნებრივია, რომ სატელევიზიო სიუჟეტის მომზადებისას, სხვადასხვა მიზნით, გარკვეული აუდიო თუ ვიდეო მასალა შესაძლოა დამზადდეს მონტაჟის გზით, ისე რომ არ იცვლებოდეს მისი რეალური შინაარსი. თუმცა, მოცემულ შემთხვევაში, აუდიო ჩანაწერების მონტაჟის შედეგად, შერჩევითი ფიქსაციის გზით, მიღებულია შეცვლილი შინაარსის მქონე სიტყვები და წინადადებები. მონტაჟის პროცესში, გამოყენებულია საუბრის მონაწილეთა მიერ სხვადასხვა დროსა და ვითარებაში წარმოთქმული წინადადებები, სიტყვები, ზოგ შემთხვევაში ბგერებიც კი. საერთო ჯამში, მონტაჟის ავტორთათვის სასურველი შინაარსის მქონე აუდიო ჩანაწერების მისაღებად, ჩანაწერებში, მონტაჟის კვალი აღინიშნება 170 ადგილას", — აცხადებენ ისინი.

მეტიც, უწყება საუბრობს სავარაუდოდ სხვა ადამიანების ხმების გამოყენებაზეც და ამას "მეტი სიმძაფრის" შექმნის სურვილით ხსნის.

"ექსპერტიზით დასტურდება, რომ აუდიო ჩანაწერებისთვის მეტი სიმძაფრის შესაძენად და საუბრებში სავარაუდო დანაშაულის ნიშნების ხელოვნურად შესაქმნელად, 21 ადგილას გამოყენებულია სხვა, უცნობ პირთა ხმები, რომლებიც არ ეკუთვნით ირაკლი ღარიბაშვილს, ბერა ივანიშვილს ან ანზორ ჩუბინიძეს.

მონტაჟის პროცესში ამავდროულად გამოყენებულია პროგრამული იმპულსები, რომლებიც მეტყველების ნაწილის გარჩევას შეუძლებელს ხდის, ზოგ შემთხვევაში კი ახდენს ბგერების დამახინჯებას. მსგავსი მანიპულაციების ფონზე, მოსაუბრეთა მიერ რეალურად წარმოთქმული სიტყვებისგან მიღებულია დაინტერესებულ პირთათვის სასურველს მიმსგავსებული სიტყვები", — აცხადებენ უწყებაში.

უწყება ამტკიცებს, რომ სხვადასხვა დროს ნათქვამ ბგერებისა და სიტყვების გამოყენებით, ღარიბაშვილის, ივანიშვილის და ჩუბინიძის განცადებები დამახინჯებულია და მაგალითად ორი სიტყვა "მინისტრები" და "ტრი" მოჰყავს.

"ერთ-ერთ ასეთ ფაქტს წარმოადგენს მოდელირების კონკრეტული მაგალითი, სადაც აუდიო ჩანაწერების საჯაროდ გავრცელების შემდეგ, ირაკლი ღარიბაშვილის და ბერა ივანიშვილის საუბარში ნახსენებ სიტყვებზე დაყრდნობით — "დაგირეკავენ მინისტრები", ვითარდებოდა მოსაზრება, რომ ჩანაწერები დამზადებული იყო 2012 წლის შემდგომ, ირაკლი ღარიბაშვილის მინისტრობის პერიოდში, რადგან გავრცელებული ჩანაწერის თანახმად თითქოსდა დიალოგისას ნახსენები იყო სიტყვა — მინისტრები.

ექსპერტიზის დასკვნით კი დგინდება, რომ აუდიო ჩანაწერებში სიტყვა "მინისტრები" საერთოდ ნახსენები არ არის, არამედ მონტაჟის ფონზე, ორი სიტყვის რედაქტირების შედეგად მიღებულია სიტყვები "მილი" და "სტები", ხოლო მათი შერჩევითი ფიქსაციის გზით მიღებულია მიმსგავსებული სიტყვა მილი-სტები", — ამტკიცებენ ისინი.

თუმცა თავად ღარიბაშვილი ამ ჩანაწერების შეფასებისას ამბობდა, რომ ჩანაწერებში ნახსენები კომუნიკაცია მინისტრებთან განპირობებული იყო მისი საქმიანობით ფონდ ქართუში.

დასკვნის სახით პროკურატურაში ამბობენ, რომ ფალსიფიცირებულ აუდიო ჩანაწერებს მტკიცებულებითი ძალა არ გააჩნია და ისინი გამოძიებას არა მათ შინაარსზე, არამედ კერძო საუბრის უნებართვო ჩაწერის და მიყურადების, ასევე კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის უკანონოდ გამოყენებისა და გავრცელების ფაქტზე დანაშაულის ჩამდენ პირთა მხილების და გამოვლენის მიზნით გააგრძელებენ.

მათივე მტკიცებით, კერძო საუბრის კომუნიკაციის ჩანაწერის, უკანონოდ გამოყენებისა და გავრცელების ფაქტზე გამოძიება არ მიმდინარეობს ჟურნალისტების ან მედია საშუალების მხრიდან საჯარო სივრცეში აღნიშნული ტიპის ჩანაწერის გავრცელებაზე პასუხისმგებლობის მიმართულებით.

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე, სავარაუდოდ, იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იცინიან. ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

პროკურატურამ აღნიშნულ საქმეზე გამოძიება კერძო საუბრის უკანონო მიყურადების, ჩაწერისა და გავრცელების მუხლით დაიწყო.

სამი დღის შემდეგ, 9 მარტს, ბერა ივანიშვილმა განაცხადა, რომ 2011 წელს მისი ფანების მშობლებმა ბულინგის შესახებ აცნობეს და დაცვის სამსახურმა "ყველა კანონის, მორალის დაცვით მოინახულა" ისინი. ბერა ივანიშვილმა, ასევე, განაცხადა, რომ თუ ვინმე დედას შეაგინებს, აუცილებლად მოსთხოვს პასუხს დღესაც.

გაიგეთ მეტი: