დღეს საქართველოს საკონსტიტუციო სასამართლოს მიერ მიღებულ გადაწყვეტილებას თეთრი ხმაურის მოძრაობა კიდევ ერთი გამარჯვებას უწოდებს და დასძენს, რომ აღნიშნული გადაწყვეტილების საფუძველზე არაერთ ადამიანს მიეცემა შესაძლებლობა, დატოვოს საპატიმრო დაწესებულება და მოიხსნას პირობითი სასჯელი.

მოძრაობა აცხადებს, რომ მზადაა ნედლ მარიხუანაზე მსჯავრდებულ პირებს სამართლებრივ პროცედურებთან დაკავშირებით დახმარება გაუწიოს.

საკონსტიტუციო სასამართლომ დღეს, 15 თებერვალს, ძალადაკარგულად ცნო სისხლის სამართლის კოდექსის 260-ე მუხლის პირველი ნაწილის ის ნორმატიული შინაარსი, რომელიც ითვალისწინებს თავისუფლების აღკვეთის გამოყენების შესაძლებლობას 100 გრამამდე ნედლი მარიხუანის პირადი მოხმარების მიზნით შეძენა-შენახვას. აღნიშნული მოთხოვნა მითითებული იყო ბოლნისის რაიონული სასამართლოს წარდგინებაში. სადავო ნორმა საქმის არსებითი განხილვის გარეშე სცნეს ძალადაკარგულად.