ნაციონალური მოძრაობის ერთ-ერთი ლიდერის, სალომე სამადაშვილის განცხადებით, ქვეყნის საერთაშორისო პარტნიორებს ქართული ოცნებისგან განსხვავებული ხედვა აქვთ.

"მინდა გითხრათ, რომ ქართული ოცნებისგან ძალიან განსხვავებული ხედვა აქვთ ჩვენს პარტნიორებს ევროპაშიც და ამერიკის შეერთებულ შტატებშიც. იმისთვის რომ შეთანხმება შედგეს, ქართულმა ოცნებამ უნდა გაითვალისწინოს, მათ შორის, ის ძალიან მკაფიო გზავნილები, რაც მას მიაწოდეს როგორც ბრიუსელში, ასევე, ვაშინგტონში. თუ ისინი ამ გზავნილებს უგულებელყოფენ, ქართული ოცნება ღიად ეუბნება ჩვენს დასავლელ მოკავშირეებს, რომ არ აინტერესებს მათი აზრი, რომ მათთვის მნიშვნელოვანი არ არის ჩვენი ქვეყნის მომავალი არც ევროკავშირში, არც ნატოში და ამაზე პასუხს მიიღებენ, როგორც ქართული საზოგადოებისგან, ასევე ჩვენი პარტნიორებისგან", — განაცხადა სამადაშვილმა.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს დღეს, 29 მარტს ხვდება.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.