პრემიერმინისტრობის კანდიდატის, ირაკლი ღარიბაშვილის განცხადებით, არავინ იცის როდის დასრულდება კორონავირუსით გამოწვეული პანდემია, ამიტომ მისი თქმით, "მხოლოდ წინა ხელისუფლებასთან შედარება" საკმარისი აღარ არის და ძალისხმევის "გაათმაგებაა" საჭირო. ამის შესახებ მან პარლამენტში სიტყვით გამოსვლისას ისაუბრა და ქართული ოცნების მმართველობის პერიოდი წინა ხელისუფლებას რამდენჯერმე მაინც შეადარა.

"მთელს მსოფლიოში იცვლება რეალობა. დღეს ჩვენ ომში ვართ უხილავი მტრის წინააღმდეგ. სახეზე არის უმძიმესი შედეგები, მწვავე ეკონომიკური კრიზისი, ჯერ კიდევ არ ვიცით როდის დასრულდება ეს პანდემია და უხილავი ომი, ამიტომ საკმარისი აღარ არის წინა ხელისუფლებასთან შედარება მხოლოდ. საჭიროა გავაათმაგოთ ძალისხმევა, რათა შევძლოთ გარღვევა ეკონომიკაში", — განაცხადა მან.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

იმავე დღეს ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი მეორედ გახდება.