ქართული ოცნების დეპუტატი, სოზარ სუბარი ფიქრობს, რომ ექსპრემიერმა გიორგი გახარიამ "ერთ დღეში გაფლანგა და წყალს გაატანა ნდობა". მან გახარიას გადაწყვეტილებას ისევ "გაუგებარი" უწოდა და აღნიშნა, რომ ახლა უფრო მეტი დეტალი იცის, მაგრამ მაინც არ ესმის და "დამაზიანებლად" მიაჩნია.

"ამ პერიოდში წასვლა, ამ ფორმით წასვლა, რა თქმა უნდა, იყო დამაზიანებელი და ისევ გავიმეორებ, შეუწყნარებელიც, ჩემი აზრით. ამას სახელს ვერ ვარქმევ. არ შეიძლება ასეთი რამის გაკეთება გუნდის წევრისგან და ლიდერისგან. პასუხი მივიღე, მაგრამ გაუგებარი. არ უნდა მოიქცეს ადამიანი ასე, რად უნდა ახლა ამას... გაუგებარი იმას კი არ ნიშნავს, რომ ვერ ვხვდები, ადამიანურად ვერ ვხვდები თორე გონებაში ყველაფერი შეიძლება... არ არის სწორი ასეთი საქციელი და მორჩა, დამთავრდა.

რაც შეეხება პრემიერს — არჩევნები ახალი ჩავლილია, მე ვიყავი მაჟორიტარობის კანდიდატი სამგორში და ყველგან, სადაც მივდიოდი, მხვდებოდა ის, რომ გიორგი გახარიას მიმართ ნდობა არსებობდა. ყველგან მხვდებოდა სხვათაშორის და ძალიან დადებითად მოქმედებდა პირადად ჩემს, როგორც მაჟორიტარის საარჩევნო კამპანიაზე. უბრალოდ, მას შეეძლო, ეს ნდობა გამოეყენებინა ქვეყნისთვის სასარგებლოდ. მგონია, რომ ერთ წამში, ერთ დღეში გაფლანგა და წყალს გაატანა მის მიმართ ნდობა. არ ვიცი, რამდენად ღირდა, ამის სანაცვლოდ მოეპოვებინა მას ხუხაშვილის და კვესიტაძის შექება", — განაცხადა მან იმედის ეთერში.

სუბარის თქმით, გახარიას გადადგომის სურვილზე რამდენიმე თვის წინ გაიგო, მაგრამ არა პარტიის ლიდერებისგან, არამედ გარშემომყოფებისგან და ეს მასთან არ გადაუმოწმებია.

"გადადგომაზე მანამდე ბევრჯერ იყო ლაპარაკი, არაერთხელ იყო ასეთი მოარული ხმები, თუმცა მე პირადად მისთვის არც მიკითხია. რაც მქონდა ინფორმაცია, კი, ნამდვილად აპირებდა წასვლას, ეს იყო რამდენიმე თვის წინ. რამდენიმე თვის წინ იყო ეს სერიოზული ლაპარაკი ისე, რომ... ნუ, ახლა, რა ვიცი, ვამბობ ისე, რასაც წრეებში ამბობდნენ, მაგრამ ახლა, მე არ ჩამითვლია საჭიროდ, რომ მისთვის მეკითხა, მე არ მიმიღია ეს ინფორმაცია სერიოზულად და ამიტომ არ ვიცი, ეს მართალია თუ არა. უბრალოდ, ბევრი ვიღაცა რომ ლაპარაკობს, გიჩნდება, მართლა რამე ხდება თუ არა.

რამდენიმე დღის წინ თვითონ ძალიან მკაფიოდ თქვა, რომ არსად წასვლას არ აპირებს და მე ეს ჩავთვალე, როგორც აბსოლუტურად ნორმალური და მისი დამოკიდებულება. გუნდის შიგნით, გადაწყვეტილების მიმღებ პირებში ამაზე ლაპარაკი არასდროს არ ყოფილა. წეღან რაც ვახსენე, ირგვლივ რომ ლაპარაკობენ, ასეთ დონეზე რჩება", — განაცხადა მან.

18 თებერვალს პრემიერმინისტრი, გიორგი გახარია თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობაა.

იმავე დღეს პრემიერმინისტრობის კანდიდატად, ქართულმა ოცნებამ ყოფილი პრემიერი და მოქმედი თავდაცვის მინისტრი ირაკლი ღარიბაშვილი წარადგინა. მეორე დღეს ღარიბაშვილმა სამთავრობო გუნდი წარადგინა, სადაც მხოლოდ 2 ცვლილება იყო — მისი შემცვლელად მისივე პირველი მოადგილე, ხოლო ინფრასტრუქტურის და ვიცე-პრემიერის, მაი ცქიტიშვილის შემცვლელადაც ასევე პირველი მოადგილე. ცქიტიშვილმა განაცხადა, რომ წასვლა თავად სურდა.