ქართული ოცნების დეპუტატი, სოზარ სუბარი საქართველოს ყოფილ, მესამე პრეზიდენტ მიხეილ სააკაშვილს მოუწოდებს, დროულად ჩამოვიდეს საქართველოში და სასამართლოს მიერ მისთვის მისჯილი სასჯელი მოიხადოს. სუბარის თქმით, "არასასიამოვნოა ასაკში ადამიანი ციხეში იჯდეს".

"მინდა ოპოზიცია მოვუწოდო, დავამშვიდო, მათი დილის ხანმოკლე სიხარული, ეიფორია აღმოჩნდა მართლაც ძალიან ხანმოკლე. სულ რაღაც რამდენიმე საათიანი. ახლა მათთან მექნება 2 ან 3 მოწოდება. პირველი დაბრუდნენ მოლაპარაკებების მაგიდასთან, ნორმალური წინადადებებით, შემოვიდნენ პარლამენტში და დაემორჩილონ კანონს და მესამე მოწოდება მექნება მათი ლიდერის მიმართ, ქვეყნის გარეთ რომელიც არის.

გარდაუვალია, რომ სამართალი აღსრულდება და რაც დროზე ჩამოვა და რაც დროზე მოიხდის თავის სასჯელს, რომელიც აქვს მისჯილი სამართლიანი სასამართლოს მიერ მით უკეთესი იქნება მისთვის. იმიტომ რომ არ არის სასიამოვნო ასაკში ადამიანი იჯდეს ციხეში", — განაცხადა სუბარმა.

რამდენიმე საათის წინ ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი მეორედ გახდება.

ნიკა მელიასთვის პატიმრობის შეფარდებიდან რამდენიმე საათში დღეს, 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გუშინ, 17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.

მთელი ღამის განმავლობაში ნაციონალური მოძრაობის ოფისში ოპოზიციური პარტიების ლიდერები იმყოფებოდნენ. ისინი აცხადებენ, რომ ხელისუფლებას მელიას დაკავების საშუალებას არ მისცემენ. დღეს დილიდან პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.