ნაციონალური მოძრაობის თავმჯდომარე, ნიკა მელია რუსეთის დუმის კომუნისტი დეპუტატის, სერგეი გავრილოვის განცხადებასთან დაკავშირებით ამბობს, რომ ეს არის პირდაპირი დირექტივა პოლიტიკური რეპრესიების გასაგრძელებლად.

"ეს არის პირდაპირი დირექტივა პოლიტიკური რეპრესიების გასაგრძელებლად დემოკრატიული ოპოზიციის წარმომადგენლებისა და 20 ივნისის აქციის მონაწილეთა დასასჯელად. წილი ნაყარია, ხაზები გავლებულია, ყველაფერი ნათელია. ერთ მხარეს დგას ოკუპანტი გავრილოვი და მეორე მხარეს — შეუპოვარი ქართველი ხალხის პროტესტი. როდის, თუ არა ახლა, ყველა ქართული ოცნების დეპუტატმა თავის თავს მნიშვნელოვანი კითხვა უნდა დაუსვას, რომელზეც პასუხის გაცემა მას მოუწევს მრავალი წლის განმავლობაში — რომელ მხარეს დგანან. დგანან გავრილოვების მხარეს, თუ დგანან ანწუხელიძის, მერაბ კოსტავების, ჟიული შარტავების, ზვიად გამსახურდიების და ეროვნული ღირსების მხარეს. ჩემზე ნუ იდარდებთ, ბატონო ქართული ოცნების დეპუტაციავ. მართლაც, თუ სადმე ოდესმე სანერვიულო ცხოვრებაში არ მქონია, სწორედ ახლა არ მაქვს", — განაცხადა მელიამ.

რუსეთის დუმის კომუნისტი დეპუტატი, სერგეი გავრილოვი ქართულ ოცნებას აქებს და ამბობს, რომ საქართველოში მმართველი პარტია აკეთებს ყველაფერს, რათა ქვეყანაში სახელმწიფო გადატრიალებები, ამბოხებები, რეპრესიები და დიქტატურა აღარ იყოს. გავრილოვთან იტერვიუ TV პირველმა ჩაწერა. მისივე მტკიცებით, ოპოზიცია საქართველოს იმიჯის შელახვას ცდილობს.

რუსი კომუნისტი დეპუტატი, რომელის საქართველოში ჩამოსვლასაც სამოქალაქო პროტესტი მოჰყვა ამტკიცებს, რომ ოკუპანტი ქვეყანა მზად არის მხარი დაუჭიროს ქართველი ხალხის თავისუფალ არჩევანს, დამოუკიდებლობასა და სუვერენიტეტს. ის ოკუპანტ ქვეყანას სტუმართმოყვარედ და მეგობრულად წარმოადგენს.

2019 წლის 20 ივნისს სამოქალაქო პროტესტი საქართველოში გავრილოვის ჩამოსვლას და მის მიერ პარლამენტის თავმჯდომარის სკამის დაკავებას მოჰყვა. მთავარი მოთხოვნა პარლამენტის თავმჯდომარის, ირაკლი კობახიძის გადადგომა იყო, რომელიც აწერდა ხელს ასამბლეის დღის წესრიგს. მას შემდეგ, რაც აქციის მონაწილეების მცირე ნაწილმა გააჟღერა მოთხოვნები პარლამენტში შესვლასთან დაკავშირებით, მათსა და პოლიციას შორის დაპირისპირება მოხდა. მოქალაქეების დიდი ნაწილი ამ პროცესში ჩართული არ ყოფილა. ხელისუფლებამ სპეცრაზმი გამოიყვანა, ისე, რომ ამის შესახებ ტერიტორიაზე შეკრებილი ადამიანები არ გააფრთხილა. გამოიყენეს რეზინის ტყვიები და ცრემლსადენი გაზი. შედეგად, რამდენიმე მოქალაქემ თვალი, ზოგმა კი მხედველობა დაკარგა.

20 ივნისის შემდეგ გავრილოვმა რუსული პროპაგანდის გავრცელება არაერთხელ სცადა. ის იღებდა და ქართულ ჯგუფებში აქვეყნებდა ვიდეოებს, სადაც ამტკიცებდა, რომ ოკუპანტი სახელმწიფო მეგობრულია. პროპაგანდის გავრცელებაში რუსული მედიაც აქტიურად იყო ჩართული. ის 20 ივნისს განვითარებულ მოვლენებს თავდასხმას უწოდებდა და თავის დროზე ქართული ოცნების ხელისუფლებისგან ბოდიშს მოითხოვდა.