ქართული ოცნების დეპუტატი, დიმიტრი ხუნდაძე პარლამენტში ახლადშესულ პარტია მოქალაქეებს მიესალმა და განაცხადა, რომ კარგია მათი პარლამენტში ყოფნა, მაგრამ უმჯობესი იქნებოდა "ცოტა მეტი" ყოფილიყვნენ. მისი თქმით, ამ შემთხვევაში მათ საგამოძიებო კომისიის შექმნის საშუალება ექნებოდათ, რის შემდეგაც აღიარებდნენ, რომ არჩევნები არ გაყალბებულა.

"მივესალმები ახლადშემოსულ ოპოზიციის წარმომადგენლებს, ღმერთმა გამრავლოთ ოპოზიციის სტატუსამდე. უბრალოდ, ბატონი ალეკოს პირველი სიტყვა, მომეჩვენა, რომ მათ გავლენა უკვე შემოჰყვათ ოპოზიციის იმ მაგიდის გარშემო მსხდომთაგან, რომელთაც ძირითადად სააკაშვილი ხელმძღვანელობდა. თან ამბობთ, რომ გავლენის ქვეშ არ ხართ, თან შემოყოლილი გაქვთ გავლენა, რომ არჩევნები გაყალბდა. თუ თქვენ ამის გჯერათ, ნუ კარგია აქ რომ ხართ, მაგრამ ჯობია, ცოტა მეტი მაინც იყოთ. საგამოძებო კომისიის შექმნის საშუალებას ჩვენ აუიცლებლად მოგცემთ და შემდეგ იქ იმუშავებთ, მაგრამ შემდეგ უნდა შეძლოთ ბოლომდე გავლენისგან გათავისუფლება და აღიაროთ, რომ არავითარ გაყალბებას ადგილი არ ჰქონია", — განაცხადა მან.

დღეს საპარლამენტო უმრავლესობამ პოლიტსაბჭოს მოსაზრება გაიზიარა და გადაწყდა, რომ ოპოზიციის მანდატებზე კენჭისყრა გადაიდება.

გუშინ, ქართული ოცნების პოლიტსაბჭოს სხდომის შემდეგ, პარტიის აღმასრულებელმა მდივანმა, მამუკა მდინარაძემ განაცხადა, რომ ოპოზიციონერი დეპუტატების მანდატებთან დაკავშირებით "მყარად და მკაფიოდ" ჩამოაყალიბეს პოზიცია, რომელსაც მხოლოდ მას შემდეგ გაახმოვანებენ, რაც საპარლამენტო უმრავლესობის წევრები ამ გადაწყვეტილებას დაადასტურებენ, ან უარყოფენ.

აღსანიშნია, რომ პარლამენტის თავმჯდომარემ, არჩილ თალაკვაძემ 30 იანვარს განაცხადა, რომ ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.

დღეს, 2 თებერვალს, პარლამენტის საგაზაფხულო სესია გაიხსნება. პლენარული სხდომაზე განსახილველი ერთადერთი საკითხი ოპოზიციონერი დეპუტატების უფლებამოსილების შეწყვეტაა.