ევროპარლამენტის ბრიტანელმა დეპუტატმა, სტივენ ვულფმა, ევროპარლამენტში საქართველოსთვის უვიზო მიმოსვლის საკითხის განხილვისას,საქართველოს ტერორისტების სატრანზიტო ქვეყანა უწოდა. მან წყაროდ ქართული გაზეთი რეზონანსი დაასახელა:

"თურქეთთან მოსაზღვრე ქვეყანა ძალიან საფრთხის შემცველია. რეზონანსმა, ქართულმა გაზეთმა დაწერა, რომ 600-700 ტერორისტი იყენებს საქართველოს, როგორც ტრანზიტულ ქვეყანას, ისლამური სახელმწიფოსთვის".

ვულფმა კოლეგებს მოუწოდა, ნუ გახსნიან საზღვრებს და ნუ დაუშვებენ იგივე შეცდომას, რაც დაუშვა მერკელმა სირიელი მიგრანტების ევროპაში შეშვებით.

გაზეთმა რეზონანსმა 2016 წლის ზაფხულში გამოაქვეყნა სტატია სათაურით: "ხალიფატის" ახალი სპეცრაზმი საქართველოზე თავდასხმისთვის". სტატიაში საუბარია, თითქოს "600-700 კარგად გადამზადებული მებრძოლისაგან შემდგარი რაზმის მთავარი მიზანი ევროპაში, ცენტრალურ აზიასა და კავკასიაში ტერორისტული აქტებისა და შეტაკებების განხორციელება იქნება". სტატიაში წერია, რომ "საქართველო და ჩრდილოეთი კავკასია ამ ბრიგადის ინტერესის არეალშია".

სტატიის ერთადერთი წყარო სამხედრო ექსპერტი ვახტანგ მაისაიაა. როგორც რეზონანსი წერს, მაისაიამ მათ გაუმხილა "ექსკლუზიური ინფორმაცია". აღნიშნული ინფორმაცია გაზეთმა მკითხველს მხოლოდ მაისაიაზე დაყრდნობით მიაწოდა და სტატიაში სხვა წყარო არ არის მოყვანილი.

ვახტანგ მაისაიას, რომელიც 2009 წლის მაისში დააკავეს, ბრალად ედებოდა სისხლის სამართლის კოდექსის 314 მუხლის პირველი და მეორე პუნქტების დარღვევა. ამ მუხლის პირველი პუნქტი ეხება უცხო ქვეყნისათვის, უცხოეთის ორგანიზაციისათვის ან მათი წარმომადგენლისათვის საქართველოს სახელმწიფო საიდუმლოების შემცველი ნივთის, დოკუმენტის, ცნობის ან სხვაგვარი მონაცემის შეგროვებას, შენახვას ან გადაცემას; ხოლო მეორე პუნქტი - ”ომიანობის ან შეიარაღებული კონფლიქტის დროს ჩადენილ ჯაშუშობას”. მას სასამართლომ 20-წლიანი პატიმრობა მიუსაჯა.

ვახტანგ მაისაია 2012 წელს ხელისუფლების ცვლილების შემდეგ პოლიტპატიმრის სტატუსით გაათავისუფლეს.