საქართველოს პარლამენტის თავმჯდომარის მოადგილის, კახა კუჭავას განცხადებით, საინფორმაციო ბიულეტენში, რომელიც ხელისუფლებამ საერთაშორისო პარტნიორებს მისწერა, პატრიოტთა ალიანსის სიით შესულ დეპუტატებს პროდასავლურად იმიტომ მოიხსენიებენ, რომ მასში აღწერილია "კონკრეტული ფაქტები" ამ პარტიის ბრიფინგიდან.

"ეს არის საინფორმაციო ბიულეტენი, სადაც აღწერილია კონკრეტული ფაქტები, მათ შორის, პარტიის დასახელება და რაც მათ განაცხადეს. ეს არის პირდაპირ აღებული ფაქტები მათი ბრიფინგიდან და ამის საინფორმაციო სახით მოხდა ცნობა. ის, თუ ვინ პროევროპულია თუ პროდასავლური, უნდა დაამტკიცონ საკუთარი ქმედებებით, როგორც ამას აკეთებს ჩვენი გუნდი. ისინი თვლიან, რომ არიან პროდასავლური ძალა, მათ მოუწევთ ამის ქმედებებით დამტკიცება", — აცხადებს კუჭავა ჩვენთან საუბრისას.

"ევროპელი სოციალისტები — პირველი ოპოზიციური პარტიაა პარლამენტში" სწორედ ასეთი სათაური აქვს ქართული ოცნების საინფორმაციო ბიულეტენს, რომელსაც ის უცხოელ პარტნიორებს უგზაგვნის და ამტკიცებს, რომ პარლამენტში პროდასავლური პარტია შევიდა. წერილი 2021 წლის 5 იანვრით არის დათარიღებული და მასში მმართველი პარტია ამ პარტიის შექმნასა და პარლამენტში შესვლას განუმარტავს.

4 იანვარს პატრიოტთა ალიანსის სიის სამ წევრს — ირმა ინაშვილს, გიორგი ლომიასა და გოჩა თევდორაძეს — პარლამენტმა სადეპუტატო უფლებამოსილება შეუწყვიტა. რაც შეეხება სიის მეოთხე ნომერს, ავთანდილ ენუქიძეს, მან მანდატზე უარი არ თქვა და პარლამენტში შევიდა. პატრიოტთა ალიანსის ის დეპუტატები კი, რომელთაც უარი თქვეს მანდატებზე, დავით ზილფიმიანმა, ფრიდონ ინჯიამ და გელა მიქაძემ ჩაანაცვლეს.

ფრიდონ ინჯიამ ნეტგაზეთს განუცხადა, რომ მის მიერ დაარსებულ პარტიაში ევროპელი სოციალისტები ზილფიმიანი, მიქაძე და ენუქიძეც გაწევრიანდებიან.