შერიგებისა და სამოქალაქო თანასწორობის საკითხებში სახელმწიფო მინისტრის, თეა ახვლედიანის განცხადებით, ისინი დე ფაქტო ხელისუფლებასთან რეგულარულ, ინტენსიურ კომუნიკაციაზე არიან და მათგან კონკრეტული პასუხის მიღებისთანავე ჩაერთვებიან პროცესში.

"ამ ეტაპზე ჩვენ ვიმყოფებით დე ფაქტო ხელისუფლებასთან ჩვენს ხელთ არსებული ყველა არხის და მექანიზმის გამოყენებით რეგულარულ და ინტენსიურ კომუნიკაციაზე და კონკრეტული პასუხის მიღებისთანავე მზად ვართ ჩავერთოთ ამ პროცესში", — აცხადებს ახვლედიანი.

მისი თქმით, სახელმწიფომ არაერთხელ დააფიქსირა მზაობა კონკრეტული გზებით დახმარებისთვის ხანძრების ჩასაქრობად.

"ოკუპირებული აფხაზეთის სხვადასხვა ტერიტორიაზე, მათ შორის, გაგრაში ხანძრის კერების გაჩენასთან დაკავშირებით ანალოგიურად არაერთხელ დავაფიქსირეთ სრული მზაობა დავეხმაროთ კონკრეტული გზებით, მათ შორის ხანძრის ვერტმფრენით ჩაქრობის საჭიროების შემთხვევაში ხელშეწყობის მიზნით", — ამბობს ახვლედიანი.

მინისტრის განცხადებით, მათ 5 იანვრის დილიდან რამდენჯერმე აამოქმედეს ცხელი ხაზი ოკუპირებული გალის რაიონში ხანძარსაწინააღმდეგო სამუშაოებში ჩართულობის მზადყოფნის დადასტურების მიზნით.

ოკუპირებულ აფხაზეთში ხანძარი 4 იანვარს გალის რაიონში გაჩნდა. საგანგებო სიტუაციების დე ფაქტო სამსახურის განმარტებით, 600 ჰექტარზე მინდვრები და ტყეები იწვოდა. ჯამში სტიქიამ 9 სოფელი მოიცვა. მათივე თქმით, სოფელ ზემო ბარღებში სამი საცხოვრებელი სახლი და სამეურნეო დანიშნულების შენობები დაიწვა. ადგილობრივი მოსახლეობა On.ge-სთან ამბობს, რომ ცეცხლის კერები სხვადასხვა ადგილას ისევ შეინიშნება.