საგარეო საქმეთა მინისტრმა, დავით ზალკალიანმა განაცხადა, რომ ნატო-საქართველოს ახალი არსებითი პაკეტი აძლიერებს ქვეყნის თავდაცვისუნარიანობას, აახლოვებს ნატოს წევრობასთან და მნიშვნელოვნად ზრდის ქვეყნის თავსებადობას ნატოს სტანდარტებთან. მანვე განმარტა, რომ ახალ პაკეტში დამატებულია 3 პროგრამა და გაზრდილია სხვადასხვა კომპონენტი.

"მნიშნველოვანი, ხელშესახები შედეგით დავბრუნდით ნატოს მინისტერიალიდან. მოგეხსენებათ, ერთხმად იქნა მიღებული ნატო-საქართველოს არსებითი პაკეტის გაძლიერებული ვერსია. 2014 წელს მიიღო საქართველომ უელსის სამიტზე ნატოს არსებითი პაკეტი, რომელიც 14 პროგრამისგან შედგებოდა, პროგრამების რაოდენობა კიდევ 3-ით გაიზარდა და მნიშვნელოვნად გაიზარდა ელემენტები და კომპონენტები, რომელიც არის ამ არსებითი პაკეტის მნიშვნელოვანი ნაწილი", — განაცხადა ზალკალიანმა.

მანვე აღნიშნა, რომ ნატოს მინისტერიალში მონაწილეობა კიდევ ერთი დასტურია იმისა, რომ საქართველოს ორგანიზაციის დღესწესრიგში მნიშვნელოვანი ადგილი უჭირავს.

"ძალიან პოზიტიურია, რომ ბოლო ორი წლის განმავლობაში საქართველო არის მიწვეული ნატოს საგარეო საქმეთა მინისტრების შეხვედრაში მონაწილეობის მისაღებად. ეს კიდევ ერთხელ ადასტურებს, რომ საქართველოს ნატოს პოლიტიკურ დღისწესრიგში უაღრესად მნიშვნელოვანი ადგილი უკავია. ამას მიანიშნებს ასვე განხილული თემები, რომელიც განვიხილეთ პარტნიორებთან ერთად", — განაცხადა მან.

ზალკალიანმა მადლობა გადაუხადა ნატოს წევრი ქვეყნების მინისტრებს საქართველოს სუვერენიტეტისა და ტერიტორიული მთლიანობის მხარდაჭერისთვის.

ნატის საგარეო საქმეთა მინისტრების შეხვედრა გუშინ, 2 დეკემბერს გაიმართა. შეხვედრის შემდეგ ნატოს გენერალურმა მდივანმა, იან სტოლტენბერგმა განაცხადა, რომ აძლიერებენ საქართველოს პრაქტიკულ მხარდაჭერას და მოხარულია, რომ დამტკიცდა ნატო-საქართველოს განახლებული არსებითი პაკეტი.

"საქართველო და უკრაინა ნატოს ღირებული პარტნიორები არიან. მათ დიდი წვლილი შეაქვთ ჩვენს მისიებში. დღეს ჩვენ ისევ განვაცხადეთ საქართველოსა და უკრაინის ტერიტორიული მთლიანობისა და სუვერენიტეტის მიმართ ჩვენი მხარდაჭერის შესახებ. ჩვენ ვიმსჯელეთ მათი რეფორმების შესახებ და ვაძლიერებთ ჩვენს პრაქტიკულ მხარდაჭერას.

მე მოხარული ვარ, რომ მოკავშირეებმა და საქართველომ დაამტკიცეს ნატო-საქართველოს განახლებული არსებითი პაკეტი, რაც ჩვენი პოლიტიკური მხარდაჭერის გაძლიერებაა. მინისტრები შეთანხმდნენ შემდგომ ნაბიჯებზე რეგიონში ჩვენს სიტუაციაზე ცნობიერების ასამაღლებლად და ორივე პარტნიორთან დიალოგის გასაძლიერებლად", — განაცხადა მან.

გარდა ამისა, სტოლტენბერგმა განაცხადა, რომ შეხვედრაზე განიხილეს შავი ზღვის რეგიონში უსაფრთხოების კუთხით არსებული სიტუაცია, რომელსაც სტრატეგიული მნიშვნელობა აქვს.

"რუსეთი განაგრძობს საქართველოსა და უკრაინის სუვერენიტეტისა და ტერიტორიული მთლიანობის დარღვევას. ის ზრდის სამხედრო კონტინგენტს ყირიმში და სულ უფრო მეტად ზრდის ძალების ოდენობას შავი ზღვის რეგიონში. პასუხად ნატო ზრდის თავის წარმომადგენლობას ხმელეთზე, საზღვაო და საჰაერო სივრცეებში", — განაცხადა მან.

ამავე თემაზე: