დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ვიცე-პრემიერისა და ინფრასტრუქტურის მინისტრის, მაია ცქიტიშვილის თქმით, საქართველოს მთავრობა ხვალ შეზღუდვებს ბევრად უფრო ნაკლებ სფეროს დაუწესებს, ვიდრე ეს გაზაფხულზე მოხდა და ეს სფეროები არ იქნება წარმოება და მშენებლობა. ამის შესახებ მან იმედის ეთერში ისაუბრა.

"გაზაფხულთან შედარებით, შეზღუდვები კიდევ უფრო ნაკლებ სფეროს შეეხება. გარდა იმისა, რომ ამ ეტაპზე ჩვენ ვსაუბრობთ წერტილოვან შეზღუდვებზე, რაც გულისხმობს იმას, რომ მხოლოდ გარკვეულ გეოგრაფულ არეალებზე, დიდ ქალაქებზე შეიძლება ამოქმედდეს შეზღუდვები, მაშინ, როდესაც დანარჩენი საქართველოს ტერიტორიაზე შეზღუდვები იქნება უფრო მსუბუქი. ამასთან ერთად, ბევრად უფრო ნაკლებ სფეროს შეეხება შეზღუდვები და მშენებლობა არის ის ერთ-ერთი სფერო, რომელსაც ამ ეტაპზე არ შევეხებით, არ ვეხებით არც სახელმწიფო ბიუჯეტით დაფინანსებულ პროექტებს და არც კერძო სამშენებლო საქმიანობას. ჩვენ, ასევე, არ ვეხებით წარმოებას, არანაირი სახეობის წარმოების შეზღუდვა არ იგულისხმება და არ ვეხებით იმ საქმიანობებს, სადაც ბევრად უფრო კარგად ხდება წესების დაცვა", — განაცხადა ცქიტიშვილმა.

მისივე თქმით, პირველ ეტაპზე კონცენტრაცია გაკეთდება სარესტორნე ბიზნესზე, სავაჭრო ქსელებზე, სადაც ადამიანების მობილობა მაღალია.

მთავრობის წევრები აანონსებენ, რომ ხვალ საკოორდინაციო საბჭოს სხდომის შემდეგ, გამოცხადდება რიგი შეზღუდვები, რაც შეამცირებს მობილობას ქვეყანაში და უზრუნველყოფს კორონავირუსის გავრცელების პრევენციას.

25 ნოემბრის მონაცემებით, საქართველოში კორონავირუსის 3 071 ახალი შემთხვევა დადასტურდა, გამოჯანმრთელდა — 3 366 ადამიანი, გარდაიცვალა — 34.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 114 889-ს. ჯამში გამოჯანმრთელებულთა რაოდენობა გაიზარდა 95 581-მდე. 2020 წლის 26 თებერვლიდან დღემდე სულ გვაქვს 1 085 გარდაცვალების შემთხვევა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: