ევროპული საქართველოს ერთ-ერთი ლიდერის, სერგი კაპანაძის განცხადებით, ოპოზიცია ხელისუფლებისგან ელოდება "გონივრულ წინადადებას". კაპანაძის თქმით, სხვა შემთხვევაში ისინი გააგრძელებენ პროტესტს, როგორც მშვიდობიანი მანიფესტაციებით, ისე სხვა ფორმებით.

"ჩვენ ველოდებით მოლაპარაკებების მომდევნო რაუნდს და ველოდებით, რომ ხელისუფლების მხრიდან რაღაც გონივრული წინადადება იქნება. თუ ეს გონივრული წინადადება არ იქნა წამოყენებული და თუ ისინი უარს აცხადებენ მოლაპარაკებების გაგრძელებაზე, მაშინ ჩვენ ვაგრძელებთ იმ სტრატეგიას, რომელიც აქამდე გვაქვს შემუშავებული. რაც გადის, კიდევ ერთხელ გავიმეორებ, არჩევნების შედეგების არაღიარებაზე, ამ პარლამენტის ლეგიტიმურად არცნობაზე და როგორც გარეთ, მშვიდობიანი მანიფესტაციების გზით, ისე სხვა ფორმების გამოყენებით პროტესტზე. იმის მცდელობაზე, რომ მიღწეული იქნას ახალი არჩევნები რაც შეიძლება მალე", — აცხადებს კაპანაძე.

მისი თქმით, მოლოდინი, რომ ინიციატივას ოპოზიცია გამოიჩენს არაადეკვატურია. კაპანაძე ამბობს, რომ ისინი მოლაპარაკებებში ჩართულები იქნებიან, თუმცა, წინადადებას ხელისუფლებისგან ელოდებიან.

"მოლოდინი ოპოზიციური პარტიებისგან, რომ ჩვენ გადავდგამთ ამ ნაბიჯს არის სრულიად არაადეკვატური. ამიტომ, ჩვენ ვაგრძელებთ ბრძოლას. ჩართული ვიქნებით, ბუნებრივია, მოლაპარაკებებში და ვნახავთ რა წინადადებით მოვა ქართული ოცნება. თუ ისინი წინადადებას არ მოიტანენ, მაშინ მივიღებთ ერთპარტიულ, საბჭოური სტილის პარლამენტს", — განაცხადა კაპანაძემ", — განაცხადა სერგი კაპანაძემ.

როგორც კაპანაძე ამბობს, ისინი პარლამენტში შესვლას არ აპირებს და ამ გადაწყვეტილებას არანაირი ფაქტორის გავლენით არ შეცვლიან.

"ჩვენ პოზიციაზე გავლენას არ ახდენს არც ერთი სხვა ფაქტორი. ეს პოზიცია გამომდინარეობს იმ რეალობიდან, რომელიც შექმნა ივანიშვილმა, როდესაც გააყალბა არჩევნები; იმ რეალობიდან, რომელიც დღეს ქვეყანაშია შექმნილი. ეს არის უმწვავესი პოლიტიკური კრიზისი, ამიტომ, ჩვენ არ ვაპირებთ, რომ ხელისუფლებას "გავუპრავოთ" ეს პარლამენტი. მას შეეძლო, რომ ეთამაშა წესებით, შეეძლო, რომ არ გაეყალბებინა და გვქონოდა ლეგიტიმურად არჩეული პარლამენტი, მაგრამ, მან ეს გზა არ აირჩია", — აცხადებს სერგი კაპანაძე.

12 ნოემბერს ოპოზიციური პარტიებსა და მმართველ გუნდს შორის მოლაპარაკებების პირველი ეტაპი გაიმართა საქართველოში აშშ-ს ელჩის, კელი დეგნანის რეზიდენციაში.

14 მარტს, მოლაპარაკებების მეორე რაუნდს ევროკავშირის ელჩი, კარლ ჰარცელიც ესწრებოდა. ოპოზიციის ლიდერები ამბობენ, რომ შეხვედრაზე დაასახელეს კონკრეტული განსახილველი საკითხი და შემდეგ ნაბიჯს ხელისუფლებისგან ელოდებიან.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

გაიგეთ მეტი: