ეკონომიკის მინისტრი, ნათია თურნავა იმედს გამოთქვამს, რომ ოპოზიციონერები "კეთილგონიერებას" მოუხმობენ და პოლიტიკურ ბრძოლას საპარლამენტო ფორმატში გადაიტანენ. მისი თქმით, ეს ერთადერთი "ცივილიზებული" გზა არის.

"ასევე, ჩვენი საერთაშორისო პარტნიორები მოუწოდებენ მათ, რომ თავი დაანებონ ასეთ დესტრუქციულ ბოიკოტს და ნებისმიერი პოლიტიკური ბრძოლა გადაიტანონ საპარლამენტო ფორმატში. მათ ეს საინტერესო მეტაფორაც კი გამოიყენოს, რომ ეს ბოიკოტი გავს ერთხელ ნანახი ფილმის ხელახლა ყურებას. ირიბად ნათქვამია, რომ ზოგიერთი ჩვენი ოპოზიციონერი, განსაკუთრებით, ულტრარადიკალური ნაწილი ჩარჩენილია წარსულში", — განაცხადა თურნავამ.

გუშინ, ამერიკის სახელმწიფო დეპარტამენტმა მაიკ პომპეოს საქართველოში ვიზიტის შესაჯამებლად გამართულ პრესკონფერენციაზე საქართველოს არჩევნების შემდგომ ოპოზიციისა და მმართველი პარტიის ურთიერთობაზე ისაუბრა და აღნიშნა, რომ მნიშვნელოვანია ისინი მოლაპარაკებების მაგიდასთან დასხდნენ და ისწავლონ ერთად მუშაობა. მათ ოპოზიციის კიდევ ერთი ბოიკოტი უკვე ნანახი ფილმის ხელახლა ყურებას შეადარეს და აღნიშნეს, რომ უმჯობესია თუ ორივე მხარე ერთად მუშაობას ისწავლის.