ლელოს გენერალური მდივნის, ბადრი ჯაფარიძის განცხადებით, ახალი არჩევნები უნდა ჩატარდეს ახალი ადმინისტრაციის და შეცვლილი კანონმდებლობის პირობებში. ამის შესახებ მან აშშ-ის სახელმწიფო დეპარტამენტის წარმომადგენელთან შეხვედრის შემდეგ განაცხადა.

"ამერიკის სახელმწიფო მდივნის მოადგილესთან ბატონ ფილ რიკერთან გვქონდა ღია საუბარი თუ რა გეგმები გვაქვს ოპოზიციას. ჩვენ გავაცანით ჩვენი პოზიცია, თუ რატომ მივიჩნევთ ამ არჩევნებს გაყალბებულად. ჩვენ მოვისმინეთ ასევე სახელმწიფოს თანაშემწის შეხედულებები ამ ფაქტთან დაკავშირებით და ძალიან მნიშვნელოვანია, რომ შეერთებული შტატები დარჩეს ძალიან აქტიურად ჩართული მიმდინარე პროცესში იმისათვის, რომ ჩვენ მოვახერხოთ შეთანხმების მიღწევა. შეთანხმების, რომელიც სჭირდება ჩვენ ხალხს და ჩვენ ქვეყანას.

ბუნებრივია, რომ ჩვენ არ ვასაჯაროებთ საუბრის დეტალებს და დიალოგს ეს არის ჩვენი შეთანხმება და აქვე ხაზგასმით, ვამბობ რომ ჩვენი პოზიცია არის უცვლელი, რომ ჩვენ მზად ვართ, ვიმუშაოთ კონსტრუქციულად და ჩვენი ურთიერთობა ხელისუფლებასთან გაგრძელდეს დიალოგის რეჟიმში, რომ ჩვენ მივაღწიოთ ახალი არჩევნების დანიშვნას. ახალი არჩევნები, რომელიც უნდა ჩატარდეს სხვა ადმინისტრაციის პირობებში და შეცვლილი კანონმდებლობის პირობებში", — განაცხადა ბადრი ჯაფარიძემ.