ნაციონალური მოძრაობის ერთ-ერთი ლიდერის, თინა ბოკუჩავას განცხადებით, ოპოზიციის პოზიცია პარლამენტში შესვლა-არ შესვლასთან დაკავშირებით ისევ მყარია. ბოკუჩავას თქმით, ქართულ ოცნებასთან ოპოზიციის მოლაპარაკებების შედეგი განსაზღვრავს იმას, როგორ გაგრძელდება ქვეყანაში პოლიტიკური ცხოვრება. ენმ-ს წარმომადგენელი, აღნიშნავს, რომ შექმნილი სიტუაციიდან გამოსავალი ხელისუფლების მხრიდან გონივრული ნაბიჯების გადადგმაა.

"ოპოზიცია საერთაშორისო პარტნიორების ჩართულობით ქართულ ოცნებასთან მოლაპარაკებებშია ჩართული. ამ არჩევნების ამ ფორმით აღიარება არ შეიძლება, იმიტომ რომ ეს არჩევნები ტოტალურად გაყალბდა და ქართველ ხალხს ბიძინა ივანიშვილმა მოპარა თავისუფალი არჩევნები", — ამბობს ბოკუჩავა.

მან, ასევე, ჟურნალისტებთან ქართული ოცნების გენერალური მდივნის ირაკლი კობახიძის მიერ ოპოზიციისთვის დებატების შეთავაზებაზე ისაუბრა. ბოკუჩავას თქმით, მიუხედავად იმისა, რომ პოსტ საარჩევნო პერიოდია, დებატებისთვის მზად არიან. თუმცა, აღნიშნა, რომ დებატები ნეიტრალურ სივრცეში, ყველა არხის მონაწილეობით უნდა მოხდეს.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. რიგგარეშე არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.