ევროპული საქართველოს ერთ-ერთი ლიდერის, გიგა ბოკერიას განცხადებით, თავდასხმა მელიას შტაბზე არის არა მხოლოდ ერთ პარტიაზე და ერთ კანდიდატზე, არამედ ეს არის ივანიშვილის რეჟიმის სახე. ამის შესახებ ბოკერიამ TV პირველის ეთერში ისაუბრა.

"ეს თავდასხმა არ არის მხოლოდ ერთ კანდიდატზე, ან ერთ პოლიტიკურ პარტიაზე თავდასხმა. ეს არის ივანიშვილის რეჟიმის სახე და რა ატმოსფერო აქვს შექმნილი. სანამ მტკიცებულებები გვექნება, რომ პირდაპირი კავშირია მთავრობასთან. ეს რომც ასე არ იყოს, მათი სახეა ყველა შემთხვევაში. მესმოდა საუბარი, კამერები იყო თუ არაო, მაგრამ ეს ხომ პირველი შემთხვევა არ არის, სულ ბოლოს ქუთაისში ოთარ კახიძის ოფისს თავს დაესხნენ აგურებით, ვერ ჩატეხეს უბრალოდ ვიტრინა, ეს გადაღებული იყო კამერებით. ეს პიროვნება იდენტიფიცირებული იყო და როგორ ფიქრობთ, რა სასჯელი მიიღო?! — საყვედური ივანიშვილის სასამართლოსგან. შეგახსნებთ კონტრასტისთვის, ანრი ოხანაშვილთან გასაუბრებისთვის ციხეში ჩასვეს კაცი, არა ფიზიკური ძალადობისთვის. ანუ, ნებისმიერ შემთხვევაში ივანიშვილის რეჟიმის სახეა ეს სამარცხვინო და ქვეყნისთვის სახიფათო ამბები", — აცხადებს ბოკერია.

ერთიანი ნაციონალური მოძრაობის ინფორმაციით, გამთენიისას გლდანში ნიკა მელიას შტაბზე თავდასხმა მოხდა. როგორც On.ge-ს მელიას შტაბის წევრმა განუცხადა, ოფისს ქვები და, სავარაუდოდ, ე.წ მოლოტოვის კოქტეილები ესროლეს.