აშშ-ს ელჩთან შეხვედრის შემდეგ პარლამენტის თავმჯდომარემ, არჩილ თალაკვაძემ აღნიშნა, რომ პოლიტიკური დიალოგი დაიწყო და ეს პოლიტიკური კონსულტაციების პოზიტიური დასაწყისია. ის იმედს გამოთქვამს, რომ მოლაპარაკებები კონკრეტული შედეგით დასრულდება.

"ჩვენ იმთავითვე ვთქვით, რომ საუბარი პოლიტიკურ პარტიებს შორის არის ქვეყნისა და საზოგადოების ინტერესებში. ვფიქრობ, რომ ეს იყო პოლიტიკური კონსულტაციების პოზიტიური დასაწყისი. მე იმედი მაქვს, რომ პოლიტიკური დიალოგი გაგრძელდება", — განაცხადა მან.

როგორც თალაკვაძე ამბობს, მათი სურვილია დაახლოვონ პოზიციები, რასაც დღევანდელი შეხვედრაც გულისხმობდა. თალაკვაძის თქმითვე, პარტიები მოლაპარაკებების შემდეგ რაუნდზეც შეთანხმდნენ.

"რაც შეეხება სკათხებს, იმ პოზიციებს, რომელიც განსხვავებულია პარტიებს შორის ჩვენი პასუხი და ჩვენი პოზიცია არის მკაფიო, მოდი ერთად გადავამოწმოთ ყველა ის საკითხი და კითხვა, რომელიც იყო დასმული ოპოზიციის მხრიდან დასმული. ჩვენ გვაქვს ძალინ კონსტრუქციული და გახსნილი პოზიცია", — აღნიშნა თალაკვაძემ.

მმართველ პარტიასა და ოპოზიციას შორის შეხვედრა აშშ-ს ელჩის, კელი დეგნანის რეზიდენციაში გაიმართა. შეხვედრას ესწრებოდა ყველა ოპოზიციური პარტია, რომელმაც არჩევნებზე ბარიერი გადალახა: გირჩი, ევროპული საქართველო, ლელო, სტრატეგია აღმაშენებელი, პატრიოტთა ალიანსი, ნაციონალური მოძრაობა, ლეიბორისტული პარტია და მოქალაქეები.