ევროპული საქართველოს ლიდერი, გიგა ბოკერია, ერთიანი ნაციონალური მოძრაობის თავმჯდომარის, გრიგოლ ვაშაძის ინტერვიუს ურთიერთგამომრიცხავი მოსაზრებების ნაკადს უწოდებს. ბოკერია ინფორმაციით, სიცრუეა, რომ დაგეგმილი იყო მოლაპარაკებები ოპოზიციასა და მმართველ გუნდს შორის და ის ჩაიშალა.

"სრული სიცრუეა ისიც, რომ თითქოს ოპოზიციაში არის დიალოგის მიუღებლობა და ამან თითქოს რაიმეს ჩაშლა გამოიწვია. ევროპულ საქართველოს და ჩვენ სხვა პარტნიორებს, პირველ რიგში, ლელოს, გირჩს და სტრატეგია აღმაშენებელს ცოტა ხნის წინ ამაზე მკაფიო განცხადება გვქონდა, რომ დიახ, დიალოგის მომხრე ვართ, დიალოგი საჭიროა, მაგრამ ის საჭიროა ამ კონკრეტულ საკითხზე, ახალი არჩევნების ჩატარებაზე და ამ კრიზისის განმუხტვაზე", — განაცხადა ბოკერიამ.

იგი სამარცხვინოს უწოდებს გრიგოლ ვაშაძის განცხადებებს ოპოზიციის პროტესტის, მოლაპარაკებებისა და პარტიასთან უთანხმოების შესახებ.

"რაც შეეხება ვაშაძის ამბავს, ეს არის ძალიან სამარცხვინო ამბავი. მესმის რომ კრიზისის დროს ყველა ადამიანი არ არის მზად, რომ პასუხისმგებლობა აიღოს, მაგრამ პასუხისმგებლობის ამ ფორმით მოხსნა არის ძალიან ცუდი საქციელი საკუთარი პარტიის მიმართ", — აცხადებს გიგა ბოკერია.

ენმ-ს თავმჯდომარემ, გრიგოლ ვაშაძემ რუსთავი 2-ის ეთერში განაცხადა, რომ ოპოზიციასა და მმართველ პარტიას შორის "თითქმის მომზადებული" დიალოგი ჩაიშალა. მან ასევე განაცხადა, რომ "სულაც არ აქვს პრობლემა" მარტო დარჩეს და ენმ-ს თავმჯდომარის პოსტი დატოვოს.

სხვა პოლიტიკოსების მოსაზრებები ვაშაძის ინტერვიუზე:

გაიგეთ მეტი: