ლელოს ლიდერი, მამუკა ხაზარაძე ამბობს, რომ მათ მოკლე დროში შექმნეს ისეთი პოლიტკური ძალა, რომელიც მმართველი პარტიის რეალური ალტერნატივა გახდა.

მისი თქმით, მმართველმა გუნდმა ყველა რესურსი გამოიყენა იმისთვის, რომ მისთვის ყველაზე ძლიერ ძალა, ლელო, არ გაემარჯვა.

"დღევანდელმა ხელისუფლებამ ყველა უკანონო მეთოდი გამოიყენა, რათა ლელოს არ გაემარჯვა. ამ არჩევნებში ქართული ოცნების მთავარი სამიზნე სწორედ ლელო იყო, რადგან მმართველ ძალას ყველაზე მეტად დღეს ლელოსი ეშინია და ამიტომაც გაუყალბა ათიათასობით ხმა. ეშინია იმიტომ, რომ ლელო ახალი, სუფთა, პროფესიონალებით დაკომპლექტებული და ქვეყნის განვითარების სტრატეგიის მქონე პარტიაა ქართულ პოლიტიკურ სივრცეში. ჩვენ არ ვმარცხდებით! ლელოს და ლელოელებს ვერ დაგვამარცხებენ, რადგან ჩვენ მართლები ვართ! ეს იყო უთანასწორო ბრძოლა ქართულ ძალასა და რუსულ მენტალიტეტს შორის", — განაცხადა ხაზარაძემ.

მისი თქმით, ლელოს გუნდი უკონკურენტოა, რადგან, იგი დაკომპლექტებულია ადამიანებით, რომლებმაც საკუთარი ძალებითა მიაღწიეს წარმატებას თავიანთ პროფესიებში.

"ჩვენ ერთად მოვახდინეთ ძლიერ ლიდერთა გუნდის ფორმირება, რომლის მთავარი მამოძრავებელი ძალა და მიზანი ჩვენი ქვეყნის გადარჩენა და ამ ჭაობიდან ამოყვანაა. ერთ წელიწადში ლელომ, თქვენთან ერთად, შეძლო სრულყოფილი პარტიული სტრუქტურის მოწყობა. სტრუქტურისა, რომელსაც პარტიები ათწლეულები აშენებენ. დღეს ლელოს მთელი ქვეყნის მასშტაბით 73 რეგიონული ორგანიზაცია აქვს. ლელო არის საქართველოს ყველა დიდ ქალაქში, რაიონულ ცენტრსა თუ სოფელში. ლელო თქვენს გვერდითაა, საქართველოს თითოეული მოქალაქის გვერდით", — განაცხადა ხაზარაძემ.

პარტიის თავმჯდომარემ ისაუბრა ლელოს მარშალის გეგმაზე, რომელიც, მათივე თქმით, არის საქართველოს რეკონსტრუქციის გეგმა.

"ახალმა "მარშალის გეგმამ“ არა მარტო საქართველოში, არამედ საერთაშორისო დონეზეც უმნიშვნელოვანესი პოზიტიური შეფასება დაიმსახურა, როგორც ყველაზე სრულყოფილმა და ძლიერმა პარტიის პროგრამულმა დოკუმენტმა. ჩვენ, ლელო, ვართ ძალა, რომელმაც ვიცით საქმის კეთება! გვიყვარს სამშობლო და ვიბრძვით ჩვენი ქვეყნის გადასარჩენად! ეს ბრძოლა ამ წუთებშიც გრძელდება, ეს ბრძოლა არ დასრულდება, სანამ საქართველოში არ გაიმარჯვებს დემოკრატია! დღეს ეს ბრძოლის ხაზი თქვენი, ჩემი და საქართველოს თითოეული მოქალაქის ხმების დაცვაზე გადის. ჩვენ თუ ამ ბრძოლას დავთმობთ, ჩვენ თუ უკან დავიხევთ, ჩვენ თუ დავნებდებით, დამარცხდებიან ჩვენი შვილები. ლელო და ლელოელები ვერ დავმარცხდებით, რადგან ჩვენსკენაა სიმართლე, ჩვენთანაა ეროვნული იდეა და ჩვენია საქართველოს მომავალი", — აცხადებს მამუკა ხაზარაძე.