ცენტრალური საარჩევნო კომისიის თავმჯდომარე, თამარ ჟვანია ღამის კურიერთან საუბარში აცხადებს, რომ არჩევნები არ დასრულებულა, საოლქო საარჩევნო კომისიებში მიმდინარეობს ოქმების დამუშავება და ოფიციალური მონაცემები იქნება უფრო ზუსტი, ვიდრე უკვე ცნობილი წინასწარი შედეგები.

"არჩევნები და შედეგები არის ზუსტად ის, რაც ხდებოდა საარჩევნო უბნებზე; რასაც აკეთებდა 42 ათასი კომისიის წევრი და რომელშიც, რა თქმა უნდა, პოლიტიკური პარტიების მიერ დანიშნული კომისიის წევრებიც შედიოდნენ; რასაც უყურებდა და აკვირდებოდა 80 ათასზე მეტი პოლიტიკური პარტიის წარმომადგენელი დამკვირვებლები და საერთაშორისო დამკვირვებლები", — ამბობს ჟვანია.

ცესკოს თავმჯდომარის თქმით, სოციალურ ქსელებსა და მედიაში გავრცელებული ოქმებში რამდენიმე სახის პრობლემაა, რაც საზოგადოებაზე უარყოფით გავლენას ახდენს.

"პირველი, ეს არის ოქმები, რომლებიც მაჟორიტარული სახის არის და ტრიალებს, თითქოსდა იქ აკლია ხმები, მაგრამ, მაჟორიტარულ ნაწილში არ იღებს ის ამომრჩეველი ზუსტად მონაწილეობას, ვინც პროპორციულში. ეს არის აბსოლუტურად გამართული ოქმები, მაგრამ, ტრიალებს როგორც ყალბი.

მეორე, რომლებსაც ახლავს შესწორებული ოქმები, მაგრამ, მხოლოდ ძირითადი ოქმები ვრცელდება და ის შესწორებული 20 ხმა იქნება, 5 თუ 10 ხმა, მიზანმიმართულად არ არის გამოტანილი.

მესამე, რომელშიც, შეიძლება, მართლა იყოს შეცდომა და არ ახლდეს შესწორების ოქმი, მაგრამ, ეს საკითხები, რა თქმა უნდა, ოლქის მიერ განხილული იქნება", — აცხადებს თამარ ჟვანია.

მისი თქმით, ცესკო ასწორებ ოქმებს, შეჰყავს შესწორებული ოქმების მონაცემები, განიხილავს საჩივრებს და მხოლოდ ამის შემდეგ გამოაქვეყნებს ოფიციალურ შედეგებს.

"დღეს მიმდინარეობს ამ ოქმების რევიზია. როგორც ცენტრალურ საარჩევნო კომისიაში შესული შედეგების თვალსაზრისით, გასწორება, ამავდროულად, რა თქმა უნდა, შესწორების ოქმების შეყვანა. კიდევ უფრო მეტიც, საჩივრები იქნება განხილული ამ საკითხებთან დაკავშირებით და თითოეული შემთხვევაზე, ნებისმიერი პოლიტიკოსი რასაც დააფიქსირებს სამართლებრივი გზით, იქნება რეაგირება. იქნება შედეგი ზუსტად ის, რაც არის საარჩევნო ყუთში", — განაცხადა თამარ ჟვანიამ.

ცესკოს წინასწარი შედეგების გამოქვეყნებისთანავე ოპოზიციონერმა ლიდერებმა საუბარი დაიწყეს არჩევნების შესაძლო გაყალბებაზე. მეორე დღეა პარლამენტის შენობასთან აქციები მიმდინარეობს, სადაც შეკრებილი საზოგადოება რიგგარეშე არჩევნების ჩატარებას ითხოვს. პროპორციული არჩევნებით პარლამენტში შესულმა ცხრა პარტიიდან რვამ — ყველამ, გარდა ქართული ოცნებისა — უარი თქვა მანდატებზე და საზოგადოებას კვირას, 8 ნოემბერს დაანონსებულ ფართომასშტაბიან აქციაზე მისვლისკენ მოუწოდა.

გაიგეთ მეტი: