დაავადებათა კონტროლის ცენტრის ხელმძღვანელის მოადგილის, პაატა იმნაძის განცხადებით, ანტიგენზე დამყარებული სწრაფი ტესტების გამოყენება ისევე მოხდება, როგორც PCR-ის და მას ექნება მსგავსი დიაგნოსტიკური ღირებულება.

"დღეს მიღებული იქნა გადაწყვეტილება, რომ სწრაფი ტესტები, ოღონდ ხაზს ვუსვამ, ეს არის არა ყველანაირი სწრაფი ტესტი, არამედ ეხება მხოლოდ ანტიგენზე დამყარებულ სწრაფ ტესტებს. ეს არის მსოფლიოში ორი ასეთი ტესტი, რომელიც არის აღიარებული და ამ ორიდან ერთ-ერთი საქართველოში ჩვენ გვაქვს. აქედან გამომდინარე, ეს არის როგორც ჯანმრთელობის მსოფლიო ორგანიზაციის რეკომენდაცია, ასევე, FDA-ს მიერ აღიარებული. ამათი გამოყენება დიაგნოსტიკისთვის მოხდება ისეთივე პროტოკოლით, როგორიც ხდება დიაგნოსტიკისათვის პჯრ-ის გამოყენება. [...] მას ექნება ისეთივე დიაგნოსტიკური ღირებულება, როგორიც აქვს პოლიმერაზა ჯაჭვურ რეაქციას", — განაცხადა იმნაძემ.

მისივე თქმით, ანტიგენზე დამყარებული სწრაფი ტესტი კეთდება სამედიცინო დაწესებულებებში, აღნიშნულ ტესტს აღარ დასჭირდება PCR-ის დადასტურება.

იმნაძემ აღნიშნა ისიც, რომ აღნიშნული ტესტების მარაგი აქვს სახელმწიფოს 150 000-მდე, თუმცა კიდევ აქვს შეკვეთილი.