"ნახევარ ოცნებას კორონა რომ აქვს და ვირუსს, მაინც გირჩი რომ ავრცელებს", — ამ სიტყვებით გამოეხმაურა გირჩის ლიდერი, ზურაბ ჯაფარიძე იმ ბარებთან დაკავშირებით გამოძიების დაწყებას, სადაც მათი შტაბებია განთავსებული.

კორონავირუსის შემთხვევების ზრდის გამო აჭარაში, იმერეთსა და თბილისში 22 საათიდან ბარებისა და რესტორნების მუშაობა იზღუდება, ამასთან აკრძალულია გასართობი ღონისძიებების მოწყობა. გამონაკლისია საარჩევნო აგიტაცია

17 ოქტომბერს შრომის ინსპექციის სამსახური და შსს შევიდა ბარ სახელოსნოში, სადაც გირჩს საარჩევნოდ შტაბი აქვს მოწყობილი. როგორც ზურაბ ჯაფარიძე ამბობს, ისინი ბარ-შტაბებში ამომრჩეველს ხვდებიან, სასმელს ყიდულობენ და სხვადასხვა თემაზე საუბრობენ.

"გვეუბნებიან რომ შტაბში შეკრების უფლება გვაქვს, ლაპარაკის უფლება გვაქვს, ალკოჰოლის მიღების უფლება გვაქვს, მაგრამ არ გვაქვს ალკოჰოლის გაყიდვის უფლება. ანუ საკუთარი ბოცებით რატომ არ დაგაქვთ შტაბში სასმელიო", — დაწერა ჯაფარიძემ ფეისბუქზე.

ბარ-შტაბების საკითხს გამოეხმაურა პრემიერმინისტრის, გიორგი გახარია. მისი თქმით, როდესაც მოქალაქეებს ჯერ კიდევ ბოლომდე გათვიცნობიერებული არ აქვთ რისკის ხარისხი, ამით მანიპულირება და მათი კლუბებსა და რესტორნებში "შეტყუება" მიუღებელია. ამასთან, მან განაცხადა, რომ რამდენიმე კომპანია, რომლებიც "ვითომ" პოლიტიკურ პროცესებში ჩართულობით ცდილობენ მუშაობის გაგრძელებას დაჯარიმდებიან.

აღნიშნულ საქმეზე შინაგან საქმეთა სამინისტრომ გამოძიება საქართველოს სისხლის სამართლის კოდექსის 248-ე პრიმა მუხლით მიმდინარეობს, რაც იზოლაციის ან/და კარანტინის წესის დარღვევას გულისხმობს.