ეროვნული ბიბლიოთეკის საზოგადოებასთან ურთიერთობის სამსახურის თანამშრომელი, ნინო გედენიძე ამბობს, რომ რამდენიმე დღის წინ მასთან სახლში ქართული ოცნების აგიტატორი მივიდა, რომელიც მასზე ზეწოლას ახდენდა. ევროპული საქართველოს ოფისში გამართულ ბრიფინგზე გედენიძემ აღნიშნა, რომ აგიტატორმა მის სამუშაო ადგილზე მიანიშნა.

როგორც ბიბლიოთეკის თანამშრომელი ამბობს, რამდენიმე კვირის წინ კარდაკარის პრინციპით მის სახლში მისულმა ქალმა კატეგორიული ტონით ჰკითხა, თუ ვის მისცემდა ხმას არჩევნებში.

"ვუთხარი, რომ არ ვეტყოდი. ამ ადამიანმა კი მომენტალურად გააკეთა დასკვნა, რომ რაკი ვმალავდი ჩემს პოზიციას, ვიყავი ოპოზიციის მხარდამჭერი. ამის შემდეგ ეს ქალბატონი წავიდა. 3 დღის წინ კვლავ მოვიდა და მითხრა, რომ არის ქართული ოცნების წარმომადგენელი და იცის, რომ მე არ ვარ მისი ამომრჩეველი, ამავე დროს, მიფიქსირებს ჩემს სამუშაო ადგილს, სახელს და გვარს და მაწვდის ოცნების მაჟორიტარობის კანდიდატის სააგიტაციო მასალას. როდესაც მე ვუთხარი, რომ ეს იყო ზეწოლა და ვთხოვე, გაემჟღავნებინა მისი სახელი და გვარი, არ მიპასუხა", — ამბობს ნინო გედენიძე.

გარდა ამისა, გედენიძე აღნიშნავს, რომ იკითხა, საიდან იცოდნენ მისი სამუშაო ადგილის შესახებ, რაზეც უპასუხეს, რომ მისი საქმე არაა.

"შემთხვევით კარდაკარ მოსიარულე ადამიანმა არ უნდა იცოდეს, მე სად ვმუშაობ. მან ძალიან კარგად იცოდა, სად ვმუშაობდი, ჩემი სახელი და გვარიც იცოდა და გამაფრთხილა ამით", — ამბობს გედენიძე.

ეროვნული ბიბლიოთეკის დირექტორი, გიორგი კეკელიძე On.ge-სთან ამბობს, რომ აღნიშნული შემთხვევის შესახებ ახლა გაიგო. როგორც მან განმარტა, თანამშრომელს დაუკავშირდება და დეტალებში გაერკვევა.

"ეროვნული ბიბლიოთეკა იშვიათი დაწესებულებაა, სადაც აბსოლუტარად დაცულია პოლიტიკური პლურალიზმი. ნებისმიერ ადამიანს ძალიან ღიად შეუძლია საკუთარი მოსაზრების გამოხატვა ნებისმიერი მიმართულებით", — განაცხადა გიორგი კეკელიძემ.

აღნიშნულთან დაკავშირებით On.ge ქართულ ოცნებასაც დაუკავშირდა. მმართველი პარტიის პასუხს მიღებისთანავე შემოგთავაზებთ.