ქართული ოცნების ერთ-ერთი ლიდერის, გია ვოლსკის განცხადებით, დაკვეთა, რომელიც ტელეკომპანია ფორმულამ განახორციელა, არ შეიძლება იყოს ობიექტური. ის ასე გამოეხმაურა Edison Research-ის კვლევას, რომლის მიხედვითაც მმართველ გუნდს მოსახლეობის 36% მისცემდა ხმას.

"მე არ ვენდობი ტელეკომპანია ფორმულას მიერ ჩატარებულ კვლევას, გარკვეული მიზეზის გამო. იმიტომ, რომ მისი დამფუძნებელი არის ადამიანი, ვინც გარკვეულ პასუხი უნდა გასცეს საზოგადოებას, განსაკუთრებით, იმ თემაზე, რასაც ჰქვია ბრძოლის ველზე მიტოვებული ცხედრები და ზოგადად, მისი დამოკიდებულება ქართული პოლიტიკისადმი, ნაციონალური მოძრაობისადმი და სხვა", — განაცხადა მან.

ვოლსკის თქმითვე, მას Edison Research-ის სხვა მონაცემები აქვს, რომლის მიხედვითაც ქართულ ოცნებას 47% აქვს, თუმცა აღნიშნა, რომ მთავარი მკვლევარი მაინც საზოგადოებაა და არჩევნებს უნდა დაველოდოთ.

ტელეკომპანია ფორმულას დაკვეთით ჩატარებული Edison Research-ის კვლევის მიხედვით, კითხვაზე, დღეს რომ ჩატარდეს საპარლამენტო არჩევნები, ვის მისცემდით ხმას, გამოკითხული მოსახლეობის 36%-მა ქართული ოცნება აირჩია, ენმ-გაერთიანებული ოპოზიცია — 17%, ევროპული საქართველო — 5%. რაც შეეხება გადაუწყვეტელი ამომრჩეველი/უარი პასუხზე, მათმა რიცხვმა 24% შეადგინა.