პარტია ლელო საქართველოსთვის პრემიერმინისტრობის კანდიდატი მამუკა ხაზარაძეა.

"ჩვენ წარმოვადგენთ არა ახალ სახეს, არამედ ახალ ძალას, ახალ შემართებას, ახალ ენერგიას, ახლებურ მიდგომას და ახლებურ მმართველობას. ჩვენ საქართველოს პრემიერმინისტრობის თანამდებობაზე გთავაზობთ ევროპული სტილის ქართველ პატრიოტს მამუკა ხაზარაძეს", — განაცხადა ლელოს წევრმა, დავით უსუფაშვილმა.

მამუკა ხაზარაძემ განაცხადა, რომ ლელო საქართველოსთვის იქნება ის ცენტრი, რომელიც გაისტუმრებს ქართულ ოცნებას და არ მოუშვებს ძველ პოლიტიკას ხელისუფლებაში.

"ჩვენ გვაქვს სერიოზული მისია, რომ ამ ქვეყანაში დავამარცხოთ ყველაზე მთავარი მტერი, დავამარცხოთ სიღარიბე, უმუშევრობა და არაპროფესიონალიზმი", —– განაცხადა მამუკა ხაზარაძემ.

ხაზარაძემ, ასევე, მარშალის გეგმის მიმართულებების ხელმძღვანელები დაასახელა:

  • ეკატერინე ქვლივიძე გაუძღვება თავდაცვის მიმართულებას;
  • ბადრი ჯაფარიძე ჩაიბარებს ეკონომიკური განვითარებისა და ფინანსურ მიმართულებას;
  • გიგლა მიქაუტაძე - რეგიონული განვითარებისა და ინფრასტრუქტურის მიმართულება;
  • ანა ნაცვლიშვილი უხელმძღვანელებს იუსტიციის საქმეებს და სასამართლოს მიმართულებას;
  • ლევან კობერიძე - უხელმძღვანელებს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მიმართულებას;
  • განათლების, მეცნიერების და სპორტის მიმართულებას ფიქრია ჩიხრაძე ჩაიბარებს;
  • შინაგანი საქმეებს და სამართალდამცავ სისტემას კახა კოჟორიძე უხელმძღვანელებს;
  • გარემოს დაცვის და სოფლის მეურნეობის მიმართულებას ნიკა შურღაია ჩაიბარებს;
  • საგარეო საქმეები და ევროატლანტიკური ინტეგრაცია - დავით უსუფაშვილი;
  • შერიგების მიმართულებას სოსო ვახტანგაშვილი უხელმძღვანელებს;
  • კულტურის მიმართულებას მედეა მეტრეველი ჩაუდგება სათავეში.

რაც შეეხება სხვა პარტიებს, ქართული ოცნების პრემიერმინისტრობის კანდიდატი გიორგი გახარიაა, ნაციონალური მოძრაობის მიხეილ სააკაშვილი, სტრატეგია აღმაშენებლის კი გიორგი ვაშაძე. ევროპულ საქართველოს პრემიერმინისტრობის კანდიდატი ჯერჯერობით არ დაუსახელებია, თუმცა პარტიული სიის პირველი ნომერი დავით ბაქრაძეა.

გაიგე მეტი: