ამერიკული მულტინაციონალური კორპორაცია ფორდი, ამერიკის არჩევნების შედეგებიდან გამომდინარე, თავის გეგმებს ცვლის და მექსიკაში საწარმოს აღარ ააშენებს.

კომპანია 700 მილიონ აშშ დოლარის ინვესტიციას, მექსიკის ნაცვლად, მიჩიგანში ჩადებს და ამით ამერიკაში 700 ახალ სამუშაო ადგილს შექმნის. მიჩიგანის საწარმოში თვითმართვად მანქანებს შექმნიან.

Ford-ის გენერალური დირექტორი მარკ ფილდზი ამბობს, რომ გადაწყვეტილებით "ნდობას უცხადებს" ამერიკის არჩეული პრეზიდენტის, დონალდ ტრამპის მიერ შექმნილ ბიზნეს-გარემოს.

ფილდზი CNN-თან საუბრისას დასძენს, რომ ფორდს არ აქვს რამე განსაკუთრებული შეთანხმება ტრამპთან.

"ჩვენ ამას ჩვენი ბიზნესისთვის ვაკეთებთ და არა დონალდ ტრამპთან შეთანხმების მისაღწევად".

ამერიკის პრეზიდენტად არჩეული დონალდ ტრამპი წინასაარჩევნო კამპანიისას აცხადებდა, რომ მექსიკისა და ამერიკის საზღვარზე კედელს ააშენებდა. არჩევნების შემდეგ, მან განაცხადა, რომ ეს იდეა განხორციელდება, თუმცა კედელი ნაწილობრივ ღობის სახით იქნება წარმოდგენილი. დონალდ ტრამპი ასევე აკრიტიკებდა მსხვილ კორპორაციებს სამუშაო ადგილების ქვეყნის გარეთ გატანის გამო.