პრემიერმინისტრ გიორგი გახარიას თქმით, ფეხბურთის გულშემატკივრები ბევრად უფრო მაღალი სამოქალაქო პასუხისმგებლობით არიან აღჭურვილნი, ვიდრე ბევრი პოლიტიკოსი. ამის შესახებ მან უწყებათშორისი საკოორდინაციო საბჭოს წევრების შეხვედრის შემდეგ გამართულ ბრიფინგზე განაცხადა.

"სამწუხაროდ, უნდა ვაღიარო, რომ ჩვენი ფეხბურთის გულშემატკივრები ბევრად უფრო მაღალი სამოქალაქო პასუხისმგებლობით არიან აღჭურვილნი, ვიდრე ბევრი პოლიტიკოსი. პოლიტიკოსები უნდა იყვნენ მაგალითის მიმცემი სხვებისთვის, პირბადის ტარებისა თუ სოციალური დისტანციის ნაწილში, რაც რთული არ არის. ზოგიერთი კი, პირიქით, აკეთებს ამას გასაღიზიანებლად", — განაცხადა გახარიამ უწყებათშორისი საკოორდინაციო საბჭოს წევრების შეხვედრის შემდეგ გამართულ ბრიფინგზე.

მისივე თქმით, კორონავირუსის პანდემიის გამო ქვეყანაში 200 ადამიანზე მეტის შეკრების შეზღუდვა არსებობს. ამიტომ, მატჩი სტადიონზე მაყურებლების დასწრებით ვერ ჩატარდებოდა. მან, ასევე, აღნიშნა, რომ საქართველო-ბელარუსის თამაშზე დასწრება დაშვებული რომ ყოფილიყო, თვითონაც დაესწრებოდა.

საქართველო-ბელარუსის საფეხბურთო მატჩი 8 ოქტომბერს მაყურებლის გარეშე ჩატარდება.

7 ოქტომბერს საქართველოში კორონავირუსის 508 ახალი შემთხვევა დადასტურდა, გამოჯანმრთელდა — 348.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: