საქართველოს საგარეო საქმეთა მინისტრმა, დავით ზალკალიანმა სომხეთ-აზერბაიჯანის კონფლიქტთან დაკავშირებით განაცხადა, რომ აუცილებელია დეესკალაცია და სამშვიდობო მოლაპარაკებების დაწყება, რადგან თუკი სიტუაცია გამწვავდა, საფრთხეს შეუქმნის არა მხოლოდ სამხრეთ კავკასიას, არამედ მთლიანად შავი ზღვის რეგიონს.

ამის შესახებ მინისტრმა ბრიუსელში გამართული შეხვედრების შემდეგ ისაუბრა და აღნიშნა, რომ ბრიუსელში ყველა შეხვედრაზე ევროპელი პარტნიორების მხრიდან გამოთქმული იყო დიდი წუხილი საქართველოს სამეზობლოში არსებულ ესკალაციასთან დაკავშირებით.

"ჩვენც ძალიან დიდი შეშფოთებით ვაკვირდებით ამ პროცესებს, რადგან ესკალაცია მძაფრდება. ეს უშუალოდ ჩვენს სამეზობლოში ხდება. ისტორიულად, ჩვენ ჩვენს აზერბაიჯანელ და სომეხ თანამოქალაქეებთან ერთად მშვიდობიანი თანაცხოვრების უაღრესად დიდი გამოცდილება გვაქვს. ეს უნდა შენარჩუნდეს მომავალშიც, რადგან თუკი სიტუაცია გამწვავდა შავი ზღვის რეგიონის მიღმაც მისი გავრცელების ძალიან დიდი ალბათობაა. ამას ყველა ძალიან კარგად აცნობიერებს", — განაცხადა დავით ზალკალიანმა.

მისი თქმით, საქართველო, ისევე, როგორც მსოფლიო თანამეგობრობა, ერთიანია სამშვიდობო მოწოდებებში, დეესკალაციის მიმართულებით განსახორციელებელ ნაბიჯებთან მიმართებაში.