ტელეკომპანია იმედის სამეურვეო საბჭოს თავმჯდომარის, ირაკლი რუხაძის განცხადებით, იმედის, მაესტროსა და GDS-ის ერთ მედიაჰოლდინგში გაერთიანებას პოლიტიკასთან კავშირი არ აქვს:

"არანაირ პოლიტიკასთან [ამ გადაწყვეტილებას] კავშირი არ აქვს. მე არ ვარ პოლიტიკოსი. ამ არხის მფლობელი საერთოდ საქართველოშიც კი არ ცხოვრობს და საქართველოს პოლიტიკაში რა ხდება, დარწმუნებული ვარ, იცის თქვენზე [ჟურნალისტებზე] ბევრად უფრო ცუდად. ეს არის აბსოლუტურად ბიზნეს გადაწყვეტილება. ეს იქნება უაღრესად მომგებიანი ბიზნეს ჯგუფი და ნახავთ თქვენ ამას."

რუხაძის თქმით, მაესტრო ძალიან წამგებიანი კომპანიაა, რაც პირდაპირ კავშირში ტელეარხის პოლიტიზაციასთან. მისივე თქმით, გაერთიანება მაესტროს მისცემს შანსს გახდეს მომგებიანი არხი:

"მაესტრო არის უაღრესად წამგებიანი კომპანია, ისევ როგორც უამრავი ტელევიზია საქართველოში. პატარ-პატარა ტელევიზიები, დარწმუნებული ვარ, არის ყველა წამგებიანი. როცა ტელევიზია არის წამგებიანი, მერე ჩნდება კითხვა, რატომ ინახავს მას მისი მფლობელი. ზუსტად ამიტომ, მგონია, რომ ხდება ტელეარხების პოლიტიზაცია - ტელეკომპანიის მფლობელი ინახავს არხს არა იმიტომ, რომ მოგება ნახოს, არამედ იმიტომ, რომ რაღაც პოლიტიკური გავლენა მოიპოვოს. ამისგან გამოსვლის, არასაკმარისი, მაგრამ პირველი ნაბიჯი არის ის, რომ ტელევიზია უნდა იყოს მომგებიანი. მაესტროს შანსი არ აქვს, რომ მომგებიანი ყოფილიყო თავისით, მაგრამ იმედთან GDS-თან და სხვა არხებთან ერთად მას შესაძლებლობა უჩნდება, იმიტომ, რომ ერთი და იგივე რესურსის გადანაწილება მოხდება ბევრი სხვადასხვა არხის მიმართ."

ჟურნალისტის კითხვას, დაიხურება, თუ არა მაესტროს საინფორმაციო გადაცემა რუხაძემ უპასუხა, რომ კანონი არის უტვინო და საინფორმაციოს გაუქმება არ იგეგმება:

"ჩვენ ასე არ ვუყურებთ იმ კანონს. ჯერ ერთი ეს არის უაზრო და უტვინო კანონი. ჩვენ არ ვუყურებთ ასე, რომ ეს კანონი ასე იკითხება ცალსახად და ჩვენ უნდა გავაუქმოთ [ახალი ამბები], მაესტროში არანაირი საინფორმაციოს გაუქმება არ იგეგმება."

„მაუწყებლობის შესახებ“ კანონში (მუხლი 60) არსებობს ნორმა, რომლის მიხედვით, ერთ ჰოლდინგში გაერთიანებით ამ სამი ტელეკომპანიიდან - იმედი, მაესტრო და GDS, მინიმუმ რომელიმე ორს საინფორმაციო და საზოგადოებრივ-პოლიტიკური პროგრამების შეჩერება და სპეციალიზირებული მაუწყებლობის დაწყება მოუწევთ.

რაც შეეხება GDS-ს, რუხაძის თქმით, GDS იქნება გასართობი არხი. ამასთან რუხაძე ამატებს, რომ სხვა იმედი კიდევ აპირებს გაფართოებას და სხვა არხების შეძენას:

"GDS ჩვენ მოგვაქვს, როგორც გასართობი არხი. რაღაც გეგმები გვაქვს, რას გავაკეთებთ ამასთან მიმართებაში. ჩვენ სხვა არხებსაც ვაპირებთ, მარტო ეს არ არის, ვაპირებთ სხვა არხების გაკეთებას - ზოგის ნოლიდან, ზოგის, თუ იქნება საინტერესო შემოთავაზებები, შეძენას. ჩვენ კიდევ გავმსხვილდებით."

ჰოლდინგმა იმედი, 27 დეკემბერს განცხადება გაავრცელა, რომლის თანახმად, ტელეკომპანია მაესტროს საკონტროლო პაკეტი შეიძინა და ტელეკომპანია GDS-ის წილის შესაძენად მოლაპარაკებები დასასრულს უახლოვდება.