სპარსეთის ყურეში მდებარე ქვეყანა ბაჰრეინი და ახლო აღმოსავლეთის რეგიონში არაბული სამყაროს მთავარი მოწინააღმდეგე, ისრაელი, სრული დიპლომატიური ურთიერთობების დამყარებაზე შეთანხმდნენ. ამის შესახებ ამერიკის შეერთებული შტატების პრეზიდენტმა, დონალდ ტრამპმა განაცხადა.

ტრამპმა ამ მოვლენას "ისტორიული მიღწევა" უწოდა. შეთანხმება მიღწეული იქნა მას შემდეგ, რაც პარასკევს ტრამპი ისრაელის პრემიერ მინისტრ, ბენიამინ ნეთანიაჰუს და ბაჰრეინის მეფეს, ჰამად ბინ ისა ალ ხალიფას ესაუბრა.

"ეს არის ისტორიული მიღწევა შუა აღმოსავლეთში შემდგომი მშვიდობისკენ", — ნათქვამია აშშ-ს, ბაჰრეინსა და ისრაელს შორის შორის ხელმოწერილ საერთო შეთანხმებაში.

ათწლეულების განმავლობაში არაბული სახელმწიფოების უმეტესობა ბოიკოტს უცხადებდა ისრაელის ახლადშექმნილ სახელმწიფოს. ისინი აცხადებდნენ, რომ ისრაელთან კავშირების დამყარება მხოლოდ მას შემდეგ მოხდებოდა, რაც პალესტინის დავა მოგვარდებოდა.

თუმცა გასულ თვეში არაბთა გაერთიანებული საემიროები (UAE) შეთანხმდნენ ისრაელთან ურთიერთობის ნორმალიზებაზე. მაშინვე გაჩნდა ვარაუდი, რომ შეიძლება ბაჰრეინსაც მიებაძა.

ტრამპმა, იანვარში წარადგინა შუა აღმოსავლეთის სამშვიდობო გეგმა, რომლის მიზანი იყო ისრაელ-პალესტინის კონფლიქტის მოგვარება, რაც უდავოდ გადამწყვეტი აღმოჩნდა პროცესების განვითარებაში.

ისრაელის პრემიერმინისტრის, ბენიამინ ნეთანიაჰუს თქმით, იგი "აღფრთოვანებულია" პარასკევს კიდევ ერთ არაბულ ქვეყანასთან სამშვიდობო ხელშეკრულების მიღწევით.

"ეს არის მშვიდობის ახალი ერა. მშვიდობა მშვიდობისათვის. ეკონომიკა ეკონომიკისთვის. ჩვენ მრავალი წლის განმავლობაში ჩავდეთ ინვესტიცია მშვიდობაში და ახლა მშვიდობა ჩადებს ჩვენში", — განაცხადა მან.

გასულ კვირას განცხადებული ბაჰრეინის ოფიციალური პოზიციით, ის საშუალებას მისცემს ისრაელისა და არაბეთის გაერთიანებულ საემიროებს ერთმანეთთან მიმოსვლისთვის გამოიყენონ მისი საჰაერო სივრცე.

ტრამპი მომავალ სამშაბათს ვაშინგტონში ისრაელ-არაბეთის გაერთიანებული საემიროების შეთანხმების ოფიციალური ხელმოწერის ცერემონიალს ჩაატარებს.