ერთიანი ნაციონალური მოძრაობის წევრის, სალომე სამადაშვილის განცხადებით, რაც უფრო მეტს საუბრობს ევროპული საქართველო მათი და ერთიანი ნაციონალური მოძრაობის განსხვავებებზე, მით უფრო რთულია გაიგო, რა არის განსხვავება. მისივე თქმით, განსხვავება მხოლოდ სააკაშვილის მიმართ დამოკიდებულებაში გამოიხატება. ამის შესახებ მან მთავარი არხის ეთერში ისაუბრა.

"გაემიჯნენ ერთიან ნაციონალურ მოძრაობას, მიხეილ სააკაშვილს, თუმცა ისევ არიან ასოცირებული იმ ხელისუფლებასთან, რომელიც მართავდა ქვეყანას 2012 წლამდე და უწევთ ახლა რაღაც ბუკლეტების დარიგება, სადაც ხსნიან რა განსხვავებაა მათსა და ენმ-ს შორის. რაც უფრო მეტს საუბრობენ ამ განსხვავებებზე, მით უფრო რთულია გაიგო, რა არის განსხვავება გარდა ერთი რამისა, დამოკიდებულებისა მიხეილ სააკაშვილის მიმართ", — განაცხადა სამადაშვილმა.

ნაციონალურმა მოძრაობამ და ძალა ერთობაშიამ ყოფილი პრეზიდენტი, მიხეილ სააკაშვილი პრემიერმინისტრობის კანდიდატად წარადგინეს. როგორც პარტიის თავმჯდომარემ, გრიგოლ ვაშაძემ თქვა, გადაწყვეტილება მათ ერთობლივად მიიღეს.

მან ბოლო ვიდეომიმართვა 27 აგვისტოს ფეისბუქზე გაავრცელა, სადაც ის ქართველებს ჩამოსვლას ჰპირდება და ბოდიშს უხდის. ვიდეომიმართვა ქართულმა ოცნებამ საკუთარ ფეისბუქგვერდზე გააზიარა წარწერით "Miha hamodiii". ქართული ოცნების ირონიულ პოსტს ევროპული საქართველო გამოეხმაურა და დაწერა: "თუ ამ წრეზე ტრიალი მოგბეზრდა, გამოსავალი ევროპული კოალიციაა." გამოწვევას მალევე გირჩის ლიდერი, ზურა ჯაფარიძეც შეუერთდა წარწერით — "shesha ar ari".