საქართველოს პრემიერმინისტრის, გიორგი გახარიას განცხადებით, ექსპრეზიდენტ მიხეილ სააკაშვილის ჩამოსვლაარჩევნების მშვიდ გარემოში ჩატარებას ხელს ვერ შეუშლის. ამის შესახებ მან საკოორდინაციო საბჭოს დასრულების შემდეგ ჩატარებულ ბრიფინგზე განაცხადა.

"კიდევ ერთხელ გავიმეორებ, მობრძანდეს, ვერავინ და ვერაფერი ქვეყნის სტაბილურობას და საარჩევნო პროცესის ნორმალურ და მშვიდ გარემოში ჩატარებას კითხვის ნიშნის ქვეშ ვერ დააყენებს", — განაცხადა გახარიამ.

საქართველოს ექსპრეზიდენტმა, მიხეილ სააკაშვილმა 6 სექტემბერს თავის ფეისბუქზე დაწერა, რომ მისი დაბრუნების გეგმასთან დაკავშირებით მორიგ მიმართვას ხვალ გააკეთებს.

მან ბოლო ვიდეომიმართვა 27 აგვისტოს ფეისბუქზე გაავრცელა, სადაც ის ქართველებს ჩამოსვლას ჰპირდება და ბოდიშს უხდის. ვიდეომიმართვა ქართულმა ოცნებამ საკუთარ ფეისბუქგვერდზე გააზიარა წარწერით "Miha hamodiii". ქართული ოცნების ირონიულ პოსტს ევროპული საქართველო გამოეხმაურა და დაწერა: "თუ ამ წრეზე ტრიალი მოგბეზრდა, გამოსავალი ევროპული კოალიციაა." გამოწვევას მალევე გირჩის ლიდერი, ზურა ჯაფარიძეც შეუერთდა წარწერით — "shesha ar ari".