ნაციონალური მოძრაობის წევრი, ხატია დეკანოიძე ამბობს, რომ საპარლამენტო უმრავლესობის ყოფილ წევრთან, კახა ოქრიაშვილთან საარჩევნოდ გაერთიანება მისთვის დისკომფორტია, თუმცა იგი ამბობს, რომ ეს ბიძინა ივანიშვილის დამარცხებისთვის საჭიროა. ამის შესახებ მან TV პირველის ეთერში ისაუბრა.

"იდეოლოგიური სხვაობა ყველა პარტია შორის არის. კიდევ ერთხელ ვიმეორებ, ჩემთვის დისკომფორტია ნამდვილად, ჩვენ ჩვენი ამოცანა გვაქვს. პარტიაში ხომ არ შემოსულა", — განაცხადა მან.

როგორც დეკანოიძე ამბობს, პოლიტიკური იდეოლოგიის სხვაობის მიუხედავად, მნიშვნელოვანია, რომ რაც შეიძლება მეტი ადამიანი "განქოცდეს" და ჩამოშორდეს ბიძინა ივანიშვილს.

საპარლამენტო არჩევნებზე ნაციონალური მოძრაობა და პროგრესი და თავისუფლება ერთ ბლოკად გავლენ. პროგრესი და თავისუფლება კახა ოქრიაშვილისა და ცეზარ ჩოჩელის დაარსებული პარტიაა და ის ოპოზიციის გაერთიანება ძალა ერთობაშიას შეუერთდა. გარდა ამისა, კახა ოქრიაშვილი ძალა ერთობაშიას ბლოკით დმანისი-ბოლნისის ოლქში იყრის კენჭს.

ევროპულ საქართველოში აცხადებენ, რომ ოქრიაშვილის კანდიდატურას მხარს არ დაუჭერენ. ხოლო ლეიბორისტული პარტიის ერთ-ერთმა წევრმა, გიორგი გუგავამ ამ გაერთიანებას "ეშმაკთან კონტრაქტი" უწოდა.

კახა ოქრიაშვილი 2004 წლიდან პარლამენტის წევრია. 2016 წლამდე ის ნაციონალური მოძრაობის დეპუტატი იყო, 2016 წელს კი ქართული ოცნების მაჟორიტარად გიორგი კვირიკაშვილმა წარადგინა და პროფესიონალ, ინიციატივიან ადამიანად დაახასიათა. ის ერთ-ერთი მაჟორიტარი დეპუტატია, რომელიც პროპორციულ საარჩვენო სისტემას მხარს არ უჭერდა.