საპატრულო პოლიციის უფროსის, ვაჟა სირაძის განცხადებით, ფილაფორმონიასთან დაშავებულებიდან, სავარაუდოდ, ორი არის მუშა, ერთი გამვლელი და ერთი დეჟავუს თანამშრომელი. მისივე თქმით, პირველადი ინფორმაციით, შემთხვევის შედეგად გარდაცვლილი პირი მუშაა.

ამ დრომდე შინაგან საქმეთა სამინისტრო და სასწრაფო სამედიცინო დახმარების ცენტრი მხოლოდ 3 დაშავებულზე ინფორმაციას ადასტურებდა.

საგანგებო სიტუაციების მართვის სამსახურის განცხადებით, პირველადი ინფორმაციით, მუშები აწარმოებდნენ სამუშაოებს და ჟანგბადის ბალონი აუფეთქდათ.

ალადაშვილის კლინიკის ექიმის განცხადებით, ფილარმონიასთან აფეთქების შემდეგ მათთან 33 წლის კაცი შეიყვანეს. მისი თქმით, პაციენტს სუნთქვის მწვავე უკმარისობა და ტრავმული შოკი აქვს, რაც სიცოცხლისთვის საშიშია. მისივე თქმით, პაციენტი მართვით სუნთქვაზე გადაიყვანეს.

გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც სიცოცხლის მოსპობა გამოიწვია.