ეხო კავკაზას ცნობით, ასობით ადამიანია შეკრებილი ოკუპირებულ ცხინვალში, რომლებიც დე ფაქტო პრეზიდენტ, ანატოლი ბიბილოვის ადმინისტრაციაში შეჭრას ცდილობენ. შენობასთან ძალოვნები არიან მობილიზებულნი.

გუშინ, 31 აგვისტოს 1 500-მდე ადამიანი შეიკრიბა ცხინვალის ცენტრში. ისინი ციხეში გარდაცვლილი ახალგაზრდის, ინალ ჯაბიევის სიკვდილის სამართლიან გამოძიებასთან ერთად, ძალოვანი სტრუქტურების ხელმძღვანელებისა და დე ფაქტო პრეზიდენტის გადადგომას ითხოვენ.

ოკუპირებული ცხინვალის რეგიონში ინალ ჯაბიევის საქმის გამოძიების მოთხოვნით საპროტესტო აქციები რამდენიმე დღეა მიმდინარეობს. მიზეზი წინასწარი დაკავების იზოლატორში 28 წლის, ინალ ჯაბიევის გარდაცვალება გახდა, რომელსაც დე ფაქტო მინისტრის მანქანისთვის ცეცხლის გახსნის ბრალდებით დააკავეს.

გარდაცვლილის ახლობლების თქმით, მას ციხეში აწამებდნენ. აქციის მონაწილეები დანაშაულში პასუხისმგებელ პირთა დასჯას ითხოვენ.

ოკუპირებული ცხინვალის ე.წ. შინაგან საქმეთა მინისტრის, იგორ ნანიევის სამსახურეობრივ ავტომანქანას ცეცხლი 18 აგვისტოს გაუხსნეს.