ბელარუსის პრეზიდენტი, ალექსანდრე ლუკაშენკო ლიეტუვას საპასუხო სანქციების დაწესებით დაემუქრა და განაცხადა, რომ ლიეტუვას თავის ადგილს მიუჩენს. ლუკაშენკოს განცხადებით, ლიეტუვის ბიუჯეტის 30% მათი სატვირთო ტრანსპორტის გავლით ფორმირდება.

"მათ ჩვენ ვაჩვენებთ, რა არის სანქციები. აწი რუსეთთან და სხვაგან ფრენა ბალტიით ან შავი ზღვის გავლით მოუწევთ. ხოლო სანქცირებულ პროდუქციაზე [პროდუქციას, რომელსაც რუსეთმა ემბარგო დაადო] — შეუძლიათ მხოლოდ იოცნებონ. მათ დაავიწყდათ, რა არის ბელარუსი და ფიქრობდნენ, რომ დაგვაჩოქებდნენ, ტანკებით, რაკეტებით შეგვაშინებდნენ. ვნახოთ, ვინ ვის შეაშაინებს", — განაცხადა ლუკაშენკომ.

მან, ასევე, აღნიშნა, რომ ბელარუსმა სანქციების პერიოდი უკვე გადაიტანა და ამბობს, რომ მას არც ახლა შეუშინდებიან.

26 აგვისტოს, ლიეტუვის საგარეო საქმეთა სამინისტრომ ინდივიდუალური სანქციების დაწესება ბელარუსის იმ ოფიციალური პირების წინააღმდეგ მოითხოვა, რომლებიც არჩევნების გაყალბებასა და ძალადობაზე არიან პასუხისმგებელი. გამოცემა TUTB.BY-ს ცნობით, შავ სიაში 100-ზე მეტი ადამიანი აღმოჩნდა. სანქციების დაწესების საკითხს, ევროკავშირის დონეზეც განიხილება.

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.