პატრიოტთა ალიანსის დეპუტატი, ირმა ინაშვილი ამბობს, რომ აფხაზებისგან დაბრუნებულ მის ნაჩუქარ ხატზე არავინ უნდა იდარდოს. ინაშვილს სჯერა, რომ ეს ხატი აფხაზებისთვის, ქართველებისა და ოსებისთვის "სასწაულს მოახდენს".

"ნურავინ ნუ დარდობს ხატის ბედზე, ღვთისმშობელი, ვარწმუნებ ყველას, დაიცავს ამ ხატს", — თქვა ინაშვილმა დღის კურიერის ეთერში.

ღიად პრორუსული პარტიის ლიდერები და საქართველოს პარლამენტის დეპუტატები, ირმა ინაშვილი და გიორგი ლომია ოკუპირებულ აფხაზეთში იმყოფებოდნენ. ირმა ინაშვილმა განაცხადა, მათ ილორის ტაძარში ღვთისმშობლის ხატი ჩაიტანეს, რომელიც მოგვიანებით უკან დაუბრუნეს.

პატრიოტთა ალიანსის ოკუპირებულ რეგიონში ვიზიტს კრიტიკა მოყვა როგორც ადგილობრივ, ასევე, დე ფაქტო ოპოზიციაში. აფხაზეთის დე ფაქტო პრეზიდენტის, ასლან ბჟანიას თანაშემწე, ლაშა საყანია, რომელმაც თავიდან უარყო, მოგივანებით კი დაადასტურა, რომ ალიანსის წევრებს შეხვდა, თანამდებობა დატოვა.

საყანია ამბობდა, აგვისტოს დასაწყისში მეგობრები დაუკავშირდნენ რუსეთის ფედერაციიდან, რომლებმაც სთხოვეს დახმარებოდა დავით თარხან-მოურავს, რომელსაც სურდა, ილორის ეკლესიისთვის ღვთისმშობლის ხატი გადაეცა. საყანიას თქმით, ამ თხოვნას "ჰუმანიტარული მიზნებით" დათანხმდა.

ამ დრომდე ირმა ინაშილი არ ამბობს, როგორ ჩავიდა აფხაზეთში და არც იმას აზუსტებს, ვინ იყო მისი მასპინძელი.