ევროპული საქართველოს საარჩევნო შტაბის ხელმძღვანელი სერგი კაპანაძე ნაციონალური მოძრაობის შესაძლო გადაწყვეტილებას ეხმაურება. მისი თქმით, ნაციონალურმა მოძრაობამ, შესაძლოა, დაარღვიოს საერთო ოპოზიციური შეთანხმება თბილისში და ისანში გიორგი ვაშაძეს კონკურენტი დაუყენოს.

"ამ ეტაპისთვის ოპოზიციას შეთანხმებული ჰყავს კანდიდატები თბილისის ყველა ოლქში და ყველა ეს კანდიდატი დადასტურდა ლეიბორისტულ პარტიაში კონსულტაციაში მონაწილე პოლიტიკური ძალებისგან, რომ ისინი არიან ჩვენი საერთო კანდიდატები და ეს არის ძალიან მნიშვნელოვანი", — აღნიშნა სერგი კაპანაძემ.

სერგი კაპანაძის თქმით, ახლა შეთანხმებების დარღვევის დრო არ არის და პოლიტიკურ პარტიებს შორის მეტი კოორდინაციაა საჭირო, მათ შორის, შესაძლოა, სხვა ოლქებშიც, რათა გაიზარდოს ივანიშვილის დამარცხების შანსი პირველ ტურში.

"ეს იქნება შეცდომა, თუ ნაციონალური მოძრაობა გადაწყვეტს, რომ საერთო ოპოზიციურ შეთანხმებას შეუქმნას საფრთხე თბილისის ერთ-ერთ კონკრეტულ ოლქში, მაგალითად, ისანში" — აცხადებს სერგი კაპანაძე.

ევროპული საქართველოს საარჩევნო შტაბის ხელმძღვანელის თქმით, ჯერჯერობით ინფორმაცია, რომ ნაციონალური მოძრაობა მხარს გიორგი ვაშაძეს არ დაუჭერს, არ არის დადასტურებული, ამრიგად, შეფასებები ნაადრევია.

"მანამ, სანამ გადაწყვეტილება არ მიღებულა, არ მინდა, მოვლენებს წინ გავუსწრო და ისეთი რამ შევაფასო, რაც ჯერ არ მომხდარა", — თქვა სერგი კაპანაძემ.