შალვა შავგულიძე, ნინო გოგუაძე და სანდრო ბარამიძე ევროპული საქართველოს გუნდს უერთდებიან. მათ თავისუფალი დემოკრატების დატოვების შესახებ დღეს განაცხადეს.

ევროპული საქართველოს მაჟორიტარობის კანდიდატმა მთაწმინდისა და კრწანისის ოლქში, შალვა შავგულიძემ, პარტია თავისუფალი დემოკრატები დატოვა. ამის შესახებ მან დღეს გამართულ პრესკონფერენციაზე ისაუბრა. მასთან ერთად პარტია დატოვეს თავისუფალი დემოკრატების ლიდერებმა ნონო გოგუაძემ და სანდრო ბარამიძემ და პარტიის ახალგაზრდული ორგანიზაციის ხელმძღვანელმა გიორგი ქიტიაშვილმა.

"საზოგადოებას მინდა ვაცნობო, რომ გადავწყვიტე, დავტოვო პარტია თავისუფალი დემოკრატები. ეს გადაწყვეტილება პარტიის გამგეობაში შექმნილმა არაჯანსაღმა ვითარებამ მიმაღებინა", — განაცხადა შალვა შავგულიძემ.

შალვა შავგულიძის თქმით, ის ვერ აიღებდა პასუხისმგებლობას პარტიის გამგეობის წევრების მოქმედებებზე. მისი თქმით, ის არ იყო დარწმუნებული, რომ პარტიის გამგეობის წევრები უერთგულებდნენ ოპოზიციურ შეთანხმებას, რომლის მიხედვითაც პარტია უარს ამბობს შეუქმნას კოალიცია ქართულ ოცნებას.

პარტიიდან წამოსვლის შემდეგ შალვა შავგულიძე, ნინო გოგუაძე და სანდრო ბარამიძე ევროპული საქართველოს გუნდს უერთდებიან.

"პარტიიდან წამოსვლის შემდეგ, ჩვენ, ინდივიდუალურად, პარტიული კუთვნილების გარეშე, გავაგრძელებთ თანამშრომლობას ევროპულ საქართველოსთან და არჩევნებში მათთან ერთად მივიღებთ მონაწილეობას, რაზეც მათგან უპირობო შემოთავაზება გვაქვს. მადლობა ევროპულ საქართველოს სანდო პარტნიორობისათვის", — განაცხადა შალვა შავგულიძემ.