მაშინ, როდესაც საპარლამენტო უმცირესობის სხდომაზე, ფინანსთა მინისტრი, სახელმწიფო ბიუჯეტთან დაკავშირებით ენმ-ის კითხვებს პასუხობდა, ლარი თითქმის ხუთი პუნქტით გაუფასურდა. ეროვნულო ბანკის 14 დეკემბრის მონაცემებით, ერთი დოლარის ფასი 2,6599 ლარი გახდა. ლარის გაუფასურებას დავით ბაქრაძე, ასე გამოეხმაურა:

"წეღან მოვისმინეთ, რომ ლარი არის მცურავი კურსი. ბატონებო მე შეიძლება ვთვლიდე, რომ თქვენ არ შეგიძლიათ ლარის დასტაბილურება, არ შეგიძლიათ ეკონომიკის წინ წაყვანა, არ შეგიძლიათ ქვეყნის მართვა, მაგრამ ნამდვილად არ მჯერა, რომ ცურვა მაინც არ იცით. ცურვა ნიშნავს იმას, როდესაც ზედაპირზე იმყოფები. როდესაც მუდმივად ქვევით ქვევით ეშვები, ეს ცურვა აღარ არის. ეს მცურავი კურსი აღარ არის. ეს არის დამხრჩვალი კურსი, რა მდგომარეობაშიც და რა კურსამდეც თქვენ მიერ გატარებულმა ნაბიჯებმა მიიყვანა ლარი."

ბაქრაძე მიიჩნევს, რომ მთავრობის ყოველ საჯარო გამოჩენზე ბაზარი უარყოფითად რეაგირებს და მთავრობის ეკონომიკური გუნდის მესიჯები კომპეტენციისა და კონკრეტული გეგმის არ არსებობაზე მიუთითებს:

"იმ დროს, როდესაც პარლამენტში მიმდინარეობს განხილვები და ამ განხილვებმა, წესით, მომავლის რწმენა უნდა განუმტკიცოს ადამიანებს, ბანკებსაც და ნებისმიერი თქვენი გამოჩენა ლარის გამყარება უნდა იყოს, იმიტომ, რომ უნდა ჩანდეს, ხალხი უნდა ხედავდეს, რომ გაქვთ გეგმა, გაქვთ ხედვა, გაქვთ კომპეტენცია და იცით რას გააკეთებთ ხვალინდელი დღისთვის. ამის ნაცვლად, ჩვენ ვიღებთ აბსოლუტურად საპირისპირო სურათს. სურათს, როდესაც მთავრობის წევრების და ეკონომიკური მინისტრების ყველა საჯარო გამოჩენა მოქმედებს ლარის კურსზე უარყოფითად და აგდებს ლარის კურსს, იმიტომ, რომ მოსახლეობისთვისაც, ბიზნესისთვისაც და ბანკებისთვისაც სრულიად გასაგებია, რომ ერთადერთი მესიჯი, რომელიც თქვენ გაქვთ ლართან დაკავშირებით არის ის, რაც წეღან გაახმოვანა თქვენმა პირველმა მოადგილემ - არ დაიჯეროთ. კიბატონო, თქვენ ნუ დაიჯერებთ, მაგრამ ჩვენ გვჯერა და ვხედავთ, რომ ქვეყნის ეკონომიკა და ქვეყანა შედის ძალიან ღრმა კრიზისში, საიდან გამოყვანაც თქვენი მთავრობის პირობებში იქნება უბრალოდ შეუძლებელი."