დასავლეთ უკრაინის ქალაქ ლუცკში შეიარაღებულმა პირმა ავტობუსი გაიტაცა და 20-მდე მგზავრი და მძღოლი მძევლად აიყვანა. ის ირწმუნება, რომ შეიარაღებაში აქვს ავტომატური ცეცხლსასროლი იარაღი, ყუმბარები და ავტობუსში განთავსებულია ორი ასაფეთქებელი მოწყობილობა. მისივე მტკიცებით, ბომბი ქალაქის ერთ-ერთ ხალხმრავალ ადგილასაც აქვს დამონტაჟებული.

პირს, რომელიც მაქსიმ პლოხოის სახელით მოქმედებს, უკრაინული მედია ტერორირსტად მოიხსენიებს. მან მოთხოვნა წაუყენა უკრაინის ხელისუფლებას, რომ 24 საათის განმავლობაში, ეკლესიის იერარქებმა, მინისტრებმა, სასამართლოსა და პროკურატურის მაღლჩინოსნებმა და პარლამენტის წევრებმა გადაიღონ ვიდეო, თქვან, რომ ისინი არიან "კანონიერი ტერორისტები" და განათავსონ ვიდეო სოციალურ ქსელში. ის ამტკიცებს, რომ სახელმწიფოა მთავარი ტერორისტი.

უკრაინული მედიის ინფორმაციით, თავდამსხმელს ფსიქიკური აშილილობა აქვს და ინციდენტამდე ფსიქიატრთან კურსს გადიოდა. მათივე ინფორმაციით, ის ნასამართლევია.

სამართალდამცავებმა მძევლებიანი ავტობუსი ალყაში მოაქცია. ტერორისტმა სამართალდამცავებს ცეცხლიც გაუხსნა. პოლიცია აცხადებს, რომ ამ დროისთვის მიმდინარეობს მოლაპარაკებები.

მომხდარს ფეისბუკ გვერდზე უკრაინის პრეზიდენტი, ვლადიმერ ზელენსკიც გამოეხმაურა. მისი თქმით, პოლიცია და უსაფრთხოების სამსახური ყველაფერს გააკეთებს იმისთვის, რომ ყველაფერი მსხვერპლის გარეშე დასრულდეს. ზელენსკის განცხადებით, მას პირად კონტროლზე აქვს საქმის მიმდინარეობა.