აშშ სომხეთსა და აზერბაიჯანს ცეცხლის შეწყვეტისკენ და დიალოგის მაგიდასთან დასხდომისკენ მოუწოდებს. ამის შესახებ აშშ-ს სახელმწიფო მდივანმა მაიკ პომპეომ ბრიფინგზე ისაუბრა.

"კავკასიის რეგიონში, სომხეთ-აზერბაიჯანის საზღვართან განვითარებული მოვლენების გამო აშშ შეშფოთებას გამოთქვამს. ასევე, მწუხარებას გამოვთქვამთ ყველა დაღუპულის გამო. ჩვენ მხარეებს დაუყოვნებლივი დეესკალაციისკენ, დიალოგისკენ და ცეცხლის შეწყვეტისკენ მოვუწოდებთ".

მეოთხე დღეა აზერბაიჯან-სომხეთის საზღვარზე დაპირისპირებაა. გამოცემა AP წერს, რომ ორივე ქვეყნის მონაცემებით შეიარაღებული შეტაკებების დროს ჯამში 16 ადამიანი დაიღუპა. მხარეები ერთმანეთს ადანაშაულებენ.

აზერბაიჯანსა და სომხეთს შორის დაძაბულობა მთიანი ყარაბაღის გამო 1988 წელს დაიწყო. ეს ტერიტორია საერთაშორისო საზოგადოების მიერ აზერბაიჯანის ნაწილადაა აღიარებული, თუმცა ის უმეტესად ეთნიკურად სომხებითაა დასახლებული.

ამჯერად, დაპირისპირება მთიანი ყარაბაღიდან მოშორებულ ტერიტორიაზე მიმდინარეობს, რაც იშვიათად ხდება. სიტუაციის ესკალაცია აზერბაიჯანის თოუზის რაიონსა და სომხეთის ტავუშის პროვინციის საზღვარზე მომხდარმა ინციდენტმა გამოიწვია.